මළ සිරුර සමඟ අවමංගල රථය පෙරළීමෙන් තුවාල ලත් දෙදෙනකු රෝහලේ

මියගිය කාන්තාවකගේ මළ සිරුරක් සකස් කිරීම සඳහා මල් ශාලාවට රැගෙන යමින් සිටි අවමංගල්‍ය රථයක් පෙරළී එහි සිටි අවමංගල්‍ය ශාලා හිමිකරු සහ තවත් අයකු තුවාල ලබා රෝහල් ගත කර ඇත.  (17දා) අලුයම් කාලයේදී මැදකන්ද මැකිලියතැන්න ප්‍රදේශයේ නිවෙසක මියගිය කාන්තාවකගේ මළ සිරුර සකස් කිරීම සඳහා මල් ශාලාවකට රැගෙන යන අවස්ථාවේ මෙම අනතුර සිදුව ඇත.

එම අවමංගල්‍ය රථය මැකිලියතැන්න මාර්ගයේ පැමිණ කටුවන උෟරුබොක්ක මාර්ගය ආසන්නයට පැමිණි අවස්ථාවේ තැඹිලි ගසක්ද පෙරළාගෙන ප්‍රධාන මාර්ගයට පෙරළී ඇත. එම අවස්ථාවේ රථයේ සිටි මල් ශාලා හිමිකරු සහ මළ සිරුර භාරව ගමන් කළ අයද තුවාල ලබා කටුවන රෝහලට ඇතුළත් කර ඇත. අවට සිටි අය රථයේ සිටි දෙදෙනා එළියට ගෙන රෝහලට යවා ඇති අතර මළ සිරුරද අසීරුවෙන් පිටතට ගෙන තිබිණි.
මෙම අනතුරෙන් අවමංගල්‍ය රථයටද බරපතළ හානි සිදුව ඇත. කටුවන පොලිසියේ නිලධාරීන් පරීක්ෂණ පවත්වයි.