Sri Lanka Rupee Converter
මේ වන විට දිවයින පුරා අධික වැසි සහිත අයහපත් කාලගුණ තත්ත්වයක්‌ ඇතිවී ඇති අතර එම තත්ත්වය කළුතර දිස්‌ත්‍රික්‌කයටද බලපෑ හැකිවේ. මේ වන විට දිස්‌ත්‍රික්‌කය පුරා මඳ අඳුරු ස්‌වභාවයක්‌ පවතී. දැනට පවතින වර්ෂාව ඉදිරියේදී වැඩිවුවහොත් ජල ගැලීම් සහ නාය යැමේ තත්ත්වයක්‌ ඇතිවිය හැකි නිසා මින් පෙර නාය යැමේ අවදානමට ලක්‌වූ සහ ජල ගැලීම්වලට ලක්‌වූ ප්‍රදේශවල ජනතාව විශේෂයෙන් අවධානයෙන් සිටින ලෙසත් දැනුම් දී තිබේ.
පසුගිය 18 වැනිදා කළුතර කුඩා හීනටියන්ගල මරික්‌කාර් මාවතේ පැති බැම්මක්‌ කඩා වැටීමෙන් නිවාස කිහිපයකට හානි සිදුවී ඇති අතර එම ස්‌ථානය අවට පදිංචිව සිටි පවුල් 9 ක සාමාජිකයන් 42 දෙනකු එම ස්‌ථානයෙන් ඉවත් කළ බවද එම පිරිස තම ඥතීන්ගේ සහ හිතවතුන්ගේ නිවෙස්‌වල මේ වන විට සිටින බවද, ඉදිරියේ ඇතිවිය හැකි හදිසි ආපදා තත්ත්වයන්ට මුහුණදීමට කළුතර දිස්‌ත්‍රික්‌ ලේකම් යූ. ඩී. සී. ජයලාල් ගේ ප්‍රධානත්වයෙන් කළුතර දිස්‌ත්‍රික්‌ ආපදා කළමනාකරණ කමිටුව අවශ්‍ය පියවර ගෙන ඇති බවද, කළුතර දිස්‌ත්‍රික්‌ ආපදා කළමනාකරණ කමිටුව අවශ්‍ය පියවර ගෙන ඇති බවද කළුතර ආපදා කළමනාකරණ මධ්‍යස්‌ථානයේ අධ්‍යක්‍ෂ කර්නල් ප්‍රසාද් ජයසිංහ වැඩිදුරටත් පැවසීය. මේ අතර පවතින කාලගුණය හේතුවෙන් මතුගම, අගලවත්ත, බුලත්සිංහල හා පාලින්දනුවර ප්‍රාදේශීය ලේකම් කොට්‌ඨාසවල සුළු ගංවතුර තත්ත්වයක්‌ ඇතිවී තිබේ.
ඊයේ උදැසන සිට මෙම ප්‍රදේශවලට වර්ෂාව ඇදහැලුණු අතර ඒ හේතුවෙන් අගලවත්ත කුඩලිගම මාර්ගය, කලවැල්ලාව - වරකාගොඩ මාර්ගය, මතුගම - යටදොළ හරහා අළුත්ගම මාර්ගය, ජලයෙන් යටවී තිබුණි. ඊයේ පස්‌වරුව වන විට යටදොළ හරහා අළුත්ගම මාර්ගයේ කීරන්තිඩිය ප්‍රදේශය යටවීම හේතුවෙන් යාන වාහන ගමනා ගමනයට බාධා එල්ල විය. මෙම වර්ෂාව හේතුවෙන් මෙතෙක්‌ අක්‍රිය මට්‌ටමේ පැවැති කුඩා ජල මාර්ග සක්‍රීය වී ඒ හරහා විශාල ජල ධාරාවන් ප්‍රධාන ඇළ, දොළ, ගංගා වෙත ඇදී ඒම හේතුවෙන් එම ගංගාවන් පිටාර මට්‌ටමට පැමිණ තිබුණි.
නිතරම ගංවතුර තර්ජනයට ලක්‌වන වෙයන්ගල්ල, කුඩලිගම ඇතුළු ප්‍රදේශවල පහත් බිම් රැසක්‌ ජලයෙන් යටවී තිබුණි.
මේ අතර පෙරේදා (19 දා) සිට සිංහරාජ වනාන්තරය ආශ්‍රිත කුකුලේගම ජල විදුලි බලාගාර කලාපයට ඇදහැලෙන ධාරානිපාත වර්ෂාව නිසා කුකුලේගඟ ජල විදුලි බලාගාරයේ එක්‌ සොරොව්වක්‌ විවෘත කර තිබේ.
තත්පරයට ඝන මීටර් 25 ක ජල ධාරිතාවක්‌ ජලාශයෙන් පහළ ප්‍රදේශයට මුදාහැරෙන අතර මෝල්කාව, පරගොඩ පහත් බිම් යටවෙමින් පවතී.
