රණවිරුවන් නිග්‍රහයට ලක්‌ කිරීම ...!!!

විජයග්‍රහණයේ සැමරුම නොඑසේනම් කොටි ත්‍රස්‌තවාදය පරාජය කර ආරක්‍ෂක හමුදා ලැබූ ජය සමරමින් පවත්වන රණවිරු පෙළපාලිය දැන් පැවැත්වෙන්නේ නැත. රණවිරු සැමරුම් පැවැත්වීමෙන් ජීනීවා මානව හිමිකම් කමිටුව කලබලයට පත්වන්නේ යෑයි ආණ්‌ඩුව තුළ බියක්‌ පවතී. එහෙත් ත්‍රස්‌තවාදය පරාජය කර අපේ රණවිරුවන් ලැබූ ජය සැමරීම නතර කිරීම බලවත් අපරාධයකි. එය සැබවින්ම දිවි පිදූ රණවිරුවන්ට සිදුකරන ලද නිග්‍රහයක්‌ ලෙස සැලකිය යුතුය. රජය විජයග්‍රහණයේ පෙළපාලි නතර කළද උතුරු මහ ඇමැති සී.වී. විග්නේෂ්වරන් ප්‍රභාකරන් සැමරීම සඳහා සූදානම් වන බව පෙරේදා "දිවයින" පුවත්පතේ වාර්තා කර තිබිණි. ලංකාවම භීතියට පත් කළ ත්‍රස්‌තයා සැමරීමට විග්නේෂ්වරන්ට ලැබුණු අමුතු බලය කුමක්‌ද? අවසන් සටන පැවැති මුල්ලිවයික්‌කාල් ප්‍රදේශයේදී මෙම සමරුව පැවැත්වෙන්නේ මැයි 18 වැනිදාය. දහස්‌ ගණනකට මරු කැඳවූ මේ ත්‍රස්‌ත නායකයා සැමරීම සමස්‌ත ලංකා ජාතියටම සිදුකරන බලවත් නිග්‍රහයක්‌ නොවන්නේද? එහෙත් යහපාලන ආණ්‌ඩුව බලයට පත්වූදා පටන් විග්නේෂ්වරන්ගේ කොටි සැමරුම් වඩා උත්කර්ෂයෙන් සිදුවිය. හිට්‌ලර් සියදිවි නසාගෙන දැන් දශක ගණනාවක්‌ ඉක්‌මවී ඇතත් කිසිවකුට ඒ නාසි නායකයා සැමරීමට ඉඩක්‌ ලැබෙන්නේ නැත. එසේම ඔසාමා බින්ලාඩන් සමරුවක්‌ ලොව කොතනක හෝ පැවැත්වෙන්නේද?
නමුත් සිංහල සොල්දාදුවන් සිය ගණනින් දිවි පිදූ මුල්ලිවයික්‌කාල් බිමේදීම ප්‍රභාකරන් සැමරීම සඳහා උත්සව සංවිධානය කර ඇත. මෙය සිදුකෙරෙන්නේ උතුරු පළාත් සභාවේ වියදමින් බව සැලය. රජයේ බදු මුදලින්ම ලංකා රාජ්‍යයට බරපතළම හානියක්‌ කළ ත්‍රස්‌තයා සැමරීම සිදුවන්නේ නම් එයින් හැඟෙන්නේ කවරක්‌ද? ජාතිය නිග්‍රහයට ලක්‌වන බව නොවේද? මෙවර ප්‍රභාකරන් වෙනුවෙන් පහන් දල්වා ලබන වසරේ ප්‍රභාකරන්ගේ පිළිම තනා පූජා පැවැත්වුවද නිහඬව සිටින්නට සිදුවේද? යාපනය විශ්වවිද්‍යාලයේ පසුගිය වසරේදී කොටි සැමරුම් පැවැත්විණි. එසේම සමහර පාසල්වලද කොටි සැමරුම් සංවිධානය කර තිබිණි. මේවාට බාධා කරන කිසිවෙක්‌ නැත. එහෙත් පාසල් සිසුන්ද කොටි සැමරුම්වලට යොමුවීම අතිශය භයානක නොවේද? බලහත්කාරයෙන් දරුවන් යුද්ධයට බඳවා ගත් ත්‍රස්‌ත නායකයා මෙලෙස රජයේ විද්‍යාල තුළ සැමරීමට ඉඩදීම කෙතරම් සදාචාර සම්පන්නද?


 කොටි හිතවාදීත්වය තවදුරටත් ප්‍රකට කරමින් දෙමළ ජනයා අතර සිය ජනප්‍රියතාවය රැක ගැනීමේ උත්සාහයක උතුරු මහ ඇමැතිවරයා නිරත වේ. එම නිසාම ප්‍රභාකරන් සැමරීමට ඔහු මූලික වී ඇත. අනෙක්‌ වාර්තාවේ දෙමළ සන්ධානයෙන් මහ ඇමැති අපේක්‍ෂකත්වය නොලැබෙන නිසා නව සංවිධානයක්‌ බිහිකර ගැනීමට හිටපු විනිසුරුවරයාට අත්‍යවශ්‍ය වී ඇත. එනිසා ඔහු කොටි සැමරුම් හරහා ජාතිවාදී බලවේග තමා වෙතට අද්දවා ගැනීමේ උත්සාහයක නිරත වෙයි. නමුත් මේ ත්‍රස්‌ත සැමරුම් හමුවේ යහපාලන ආණ්‌ඩුවේ ප්‍රධානීන් තවදුරටත් නිහඬව බලා සිටීම යුක්‌ති සහගතද? එය රණවිරුවන්ට කරන බලවත් නිග්‍රහයකි.