Sri Lanka Rupee Converter
ජිනීවා මානව හිමිකම් කොමසාරිස්‌ කාර්යාලය සතුටු කිරීම වෙනුවෙන් අතුරුදන් වූවන්ගේ කාර්යාලය සඳහා කොමසාරිස්‌වරු පත්කර ඇත. මේ කාර්යාලය සඳහා අයවැයෙන් රුපියල් කෝටි 1200 ක්‌ වෙන්කර ඇති බව සඳහන්ය. ඒ අතුරුදන් වූවන්ට වන්දි ගෙවීමටද නැතිනම් වෙනත් ක්‍රියාමාර්ගයකටද යන්න විස්‌තර කර නැත. එහෙත් මේ සඳහා පත් කළ කොමසාරිස්‌වරු දෙදෙනෙක්‌ම ප්‍රකට රාජ්‍ය නොවන ක්‍රියාකාරිකයන්ය.
2009 පසුව ලංකා හමුදාවට එරෙහිව ජිනීවා වෙත ගොස්‌ යුද අපරාධ නැගූ රාජ්‍ය නොවන සංවිධාන ප්‍රබල ක්‍රියාකාරිකයන් මේ කාර්යාලයට පත්කිරීම බොහෝ දෙනෙකුගේ විමතියට හේතුවී ඇත. හමුදාවට යුද අපරාධ චෝදනා ඉදිරිපත් කරන්නවුන් මේ කාර්යාලයට පත්කිරීමෙන් සිදුවන්නේ කවරක්‌ද? ශ්‍රී ලංකා රජයට එරෙහිවම මේ අතුරුදන්වූවන්ගේ කාර්යාලයේ කොමසාරිස්‌වරුන් ක්‍රියාත්මක වීම නොවේද? රණවිරුවන්ට එරෙහිව යුද අපරාධ චෝදනා ඉදිරිපත් නොකරන බව ජනාධිපතිතුමා ප්‍රකාශ කළත් මේ කොමසාරිස්‌වරුන්ගේ ක්‍රියාකලාපය ඊට හාත්පසින්ම වෙනස්‌ වන බව පැහැදිලිව සටහන් කළ හැකිය.
ඇත්තෙන්ම මේ රාජ්‍ය නොවන ක්‍රියාකාරිකයන් මෙවන් ආයතනයකට පත්කිරීමට උපදෙස්‌ ලබාදුන්නේ කවරකුද? මේ පත්කිරීම් ගැන කොටි ඩයස්‌පෝරාවට නම් සතුටු විය හැකිය. මන්ද ඩයස්‌පෝරාව හා එක්‌ව රාජ්‍ය නොවන සංවිධාන ක්‍රියාකාරිකයෝ හමුදාව දංගෙඩියට යෑවීමට උත්සාහ කළහ.
අතුරුදන්වූවන්ගේ කාර්යාලය ඉදිරියේදී ක්‍රියාත්මක වනු ඇත්තේ ලංකා රජයේ වුවමනාවටද නැත්නම් ජිනීවා මානව හිමිකම් කමිටුවේ උපදෙස්‌ පරිදි දැයි පැහැදිලි නැත. එහෙත් මොවුන් අතුරුදන් වූ කවර පිරිස්‌ ගැන පරීක්‍ෂණ පවත්වයිද?
88-89 අතුරුදන් වූවන් ගැන සොයයිද? 2008-2009 කාලයේ අතුරුදන්වීම් ගැන සොයයිද? ප්‍රභාකරන්ගේ සහචරයන් විසින් අතුරුදන් කළ පුද්ගලයන් ගැන සොයයිද? දැන් උතුරේ පළාත් කිහිපයක මවුවරුන් උද්ඝෝෂණය කරන්නේද ජිනීවා මානව හිමිකම් කොමිසමේ අවධානය ලබාගැනීමටය. මරාගෙන මැරෙන ත්‍රස්‌තවාදීන්ද අතුරුදන්වූ ලැයිස්‌තුවට ඇතුළත් කර ඇත්ද?
ලංකා ආණ්‌ඩුවට එරෙහිව ත්‍රස්‌ත ප්‍රහාර එල්ල කළ කොටි සාමාජිකයන්ටද මේ කාර්යාලය හරහා වන්දි ලබා දෙයිද? එහිදී කොටි ප්‍රහාර නිසා දිවිදුන් අසරණ ලාංකිකයන්ට ලැබෙන වන්දිය කුමක්‌ද? අතුරුදන් වූවන්ගේ කාර්යාලය මේ ගැන රටට පැහැදිළි කළ යුතුය. මන්ද මේ සඳහා වෙන්කර ඇති රුපියල් කෝටි 1200 රටේ ජනතාවගේ බදු මුදල් බව සියලු දෙනා අවබෝධ කරගත යුතුය.
මේ අතුරුදන් වූවන්ගේ කාර්යාලය ගැන දේශප්‍රේමී බලවේග සෑමවිටම විරෝධය පළකළේ මේ හරහා රණවිරුවන් දංගෙඩියට යෑවීම සඳහා කුමන්ත්‍රණ සිදුකෙරෙන නිසාය. එහි කොමසාරිස්‌වරුන් පත්කළ ආකාරයෙන්ම ඒ සැකය තහවුරු වී ඇත.
