Sri Lanka Rupee Converter
- වර්ෂ 1815 පෙබරවාරි මස 19 දින සර් රොබර්ට්‌ බ්‍රවුන්රිග් ආණ්‌ඩුකාරවරයා යුද හමුදා මුලාදෑණින් කිහිපදෙනෙක්‌ද සමඟ රාත්‍රී භෝජනය ගනිමින් සිටියේය. මෙවේලේ අශ්වාරෝහකයකු පැමිණ ආණ්‌ඩුකාරවරයාට ඉතා වැදගත් ලියවිල්ලක්‌ භාර දුන්නේය. මේ ලියවිල්ල අතට ගත් ආණ්‌ඩුකාරවරයාගේ දෑස විමතියෙන් දිලිසෙන හැටි සෙස්‌සන් දුටුවෝය.
"සිංහල ර-ජුරුවෝ හිර භාරයට පත්වෙලා"
අණ්‌ඩුකාරවරයා සාඩම්බරව කීවේය. සතුටු කඳුළු වගුරමින් තමා සමඟ සිටි අන් සැමට අතට අත දුන්නේය.
"යුරෝපීය ජාතීන් තුන් වර්ගයකට අවුරුදු තුන්සිය ගණනක්‌ මුළුල්ලේ උත්සාහ කරලත් කරගන්න බැරි වුණුදේ අප කළා. ඒකට උපකාර කළ ඔබලාට මගේ අවංක ස්‌තූතිය පුදකරනවා" යෑයි ආණ්‌ඩුකාරවරයා තවදුරටත් කීවේය.
කතාව ඇත්තය. පෘතුගීසි, ලන්දේසි හා ඉංග්‍රීසි යන ජාතීන් ශත වර්ෂ තුනක්‌ මුළුල්ලේ සිංහලේ නමින් හැඳින්වූ ශ්‍රී ලංකාව යටත් කරගැනීමට දරන ලද උත්සාහය සම්පූර්ණයෙන් සාර්ථක වූයේ එදාය. "විජය රජුගේ පැමිණීමේ පටන් අවුරුදු 2357 ක දීර්ඝ කාලයක්‌ මුළුල්ලේ අවිච්ජින්නව පැවති සිංහල රාජ්‍යය හා ස්‌වෛරීභාවය මෙදින ලංකා භූමියෙන් අභාවප්‍රාප්ත වූයේ" යෑයි නයිටන් නම් ඉතිහාසඥයා කියා තිබේ.
සිංහලේ රජු සිරභාරයට ගෙන දින දොළහකට පසුව මහනුවර මඟුල් මඩුවේ දී අත්සන් කෙරුණු ගිවිසුම මගින් මුළු ශ්‍රී ලංකාවම බ්‍රිතාන්‍ය අධිරාජ්‍යයට සම්බන්ධ කරන ලදී. "සම්බුද්ධ ශාසනය ආරක්‍ෂා කරන බවටද" බ්‍රිතාන්‍යය විසින් මේ ගිවිසුමෙන් පොරොන්දු විය. අනතුරුව 1815 මාර්තු 2 දින සිට එංගලන්තයේ තුන්වැනි ජෝර්- මහරජාණන් ශ්‍රී ලංකාවේ රාජශ්‍රීයට පත්වූ බව ප්‍රකාශ කරමින් කාලතුවක්‌කු වෙඩිමුර පවත්වන ලදී.
"අවුරුදු කීපයකට පෙර මේ රටේ මනුෂ්‍යයන් සීයට එකෙකුවත්a සුරාව තොල ගෑමට පොළඹවාගත නොහැකි විය. සුරා පානය පැතිරී ගියේය. හැම ගමකම තැබෑරුම් විවෘත විය. වැසියන් සුරා පානයට ඇබ්බැහි කරනු පිණිස මුලින්ම සුරාව නොමිලේ දුන්හ."
මෙසේ කෝපි වගා කරමින්, රටේ සම්පත් සූරාකමින්, ප්‍රභූන් භේද භින්න කරමින්, සුරාවට හරවමින් රටට කරන අනර්ථය ඉවසීමට ජනතාව සුදානම් වූයේ නැත. මෙහි ප්‍රතිඵලයක්‌ වශයෙන් 1817 අගදී කැරැල්ලක්‌ පැන නැඟුනි.
ජාතිය කරදරයකට පත්වූ විට සැමදා ජාතිය අවදි කරමින් පෙරමුණ ගන්නේ මහා සංඝරත්නයයි. එදා ද එය එසේම සිදුවිය. එහෙත් එය මර්දනය කරන ලදී. මහනුවර දී අත්සන් කළ ගිවිසුමට විරුද්ධ ලෙස බුද්ධ ශාසනික කටයුතුවලදී රජය ක්‍රියා කිරීම වැසියන්ගේ රාජ්‍ය විරෝධයට හේතුවිය. නැවත මාතලේ හා කුරුණෑගල ආශ්‍රිතව කැරැල්ලක්‌ ඇතිවිය.
වසේ සත්සිය විසිපහේ සක එක්‌දහස්‌ අවදිය ලදී
මසේ අවතියවකට බිනරය රේවතී මුල පෙද සැදී
රැසේ කන්නිය දෙපැය තිස්‌ නාඩියට වී රවි දින යෙදී
මෙසේ දිනුවෙය කුඩාපොල හිමි රට නිසා සිය දිවිපිදී
එනම් ශකවර්ෂ 1725 බිනර මස අවතියවක ලත් රවි දින උදයාදී පැය දෙකයි විනාඩි තිහට උන්වහන්සේ කන්‍යා ලග්නයේ උපන් බවයි. 1848 අගෝස්‌තු 26 දින වෙඩිතබා ඝාතනය කරන ලදී. මුළු රටම සූරාකනු ලැබූ සුද්දෝ ඔවුන්ගේ නම්, ගම් ඇඳුම් පැලඳුම්, කෑම් බීම් හා ආගමික විශ්වාසයන්ද මෙරට ජනතාව පිට බලෙන් පටවන ලදී. කලු සුද්දන් බිහිවීම ඇරැඹුණේa එසේය.
එහෙත් කුඩාපොළ හාමුදුරුවන් ඝාතනය කර වසර කිහිපයකට පසුව තවත් පිංවත් කුමරෙක්‌ සිරිලක තුළ ඉපදුණි. එතුමෝ පසු කලෙක තම දිනපොතේ මෙසේ සටහන් කළහ.
"මගේ කේන්ද්‍රයේ හැටියට කොළඹ ප්‍රධාන පන්තියේ බෞද්ධ පවුලක මා ඉපදී ඇත්තේ ක්‍රිස්‌තු වර්ෂ 1864 සැප්තැම්බර් 17 වෙනිදාය. මා උපදින විට කොළඹ නගරයේ වැඳුම් පිදුම් කරන්නට බෞද්ධ විහාරස්‌ථානයක්‌ තිබුණේ නැත. පසළොස්‌වක පෝය දිනයන්හි සිල් සමාදන්වීම සඳහා බෞද්ධයෝ කොළඹ සිට සැතපුම් 10 ක්‌ පමණ දුර පිහිටි කැලණියට යති."
මෙම දරුවාට උපතින් පල්ලියෙන් ලැබුණු නම දොන් ඩේවිඩ් නම් විය. දොන් ඩේවිඩ් හේවාවිතාරණ නම් තරුණයා වැඩි කලක්‌ නොගොස්‌ ජාතියේ පියෙකු විය. ඒ අන් කවරෙකුත් නොව ශ්‍රීමත් අනගාරික ධර්මපාල තුමාය.
"සිංහලයනි නැගිටිව්" යෑයි එතුමා හ`ඩ නැගීය.
වර්තමාන සිංහලයාට ගැඹුරු ඥානයක්‌ නැත. සුද්දා අඳින ඇඳුම් ඇඳීම, සුද්දා කන ආහාර අනුභව කිරීම, සුද්දා බොන මත්පැන් බීම පමණක්‌ කරන්නට සිංහලයාට ශක්‌තිය තිබේ. සිංහලයාට ප්‍රඥාව තිබේ නම් සිංහල ජාතිය මේ තරම් පහත බසින්නේ නැත" කියමින් ජාතිය අවදි කළේය. තවදුරටත් මෙසේ කීහ.
"බුද්ධාගම ආරක්‍ෂා කරන්නට උපන් ජාතිය සිංහල ජාතියයි. වර්ෂ 2500 බුද්ධාගම ආරක්‍ෂා කළ වෙනත් ජාතියක්‌ නැත"
"අප ජාතිය නැතිවීමට මත්පැන් බීම හේතු වී තිබේ"
"කිසිම මත්පැන් වර්ගයක්‌ පානය නොකරමින් සිටි සිංහල ජනකාය නැති කර දමන්නට කටයුතු කළේ සර්ව සාධාරණ යෑයි කියනු ලබන ඉංග්‍රීසි ජාතිකයෝය."
ධර්මපාල තුමා රජයේ රැකියාවෙන් ඉවත්වී මුළු ජීවිතයම රට, ජාතිය හා ආගම වෙනුවෙන් කැප කළේය. ඉන්දියාවේ බුද්ධගයාව බේරා ගත්තේය. බෞද්ධ පාඨශාලා රට පුරාම ආරම්භ කිරීමට පුරෝගාමී විය. නිදහස්‌ සටනට පණ දුන්නේය.
අප කතා කළේ ජාතික වීරයන් දෙදෙනෙකු පිළිබඳවය. මෙහි විශේෂත්වය කුමක්‌ද? කුඩාපොල හාමුදුරුවෝත්, ධර්මපාලතුමාත් ජාතිය අවදි කරවීමටත් නිදහස ලබා ගැනීමටත් ඇප කැපවී ක්‍රියා කළහ. ධර්මපාල තුමා උපදින්නේ කුඩාපොල හාමුදුරුවෝ ඝාතනය කිරීමෙන් පසුවය.
පුදුමය නම් මේ දෙදෙනාගේම උපන් කේන්ද්‍ර දෙක බොහෝ සෙයින් එක සමාන වීමය. මේ බලන්න.
වගුව
දෙදෙනාගේම උපන් වේලාවල්ද, නැකත් හා පාද ද, ලග්නයද බුධ, ශනි, සඳු පිහිටීම්ද සමානය.
මෙයින් වටහාගත හැකිවන්නේ ජාතික වීරවරයන් නැවත නැවත උපදින බව නොවේද? ඇත්තටම මේ ජාතියට වීරයන් අවශ්‍ය යුගයයි. ධර්මපාල තුමා නැවතත් අප අතර ඉපදේවායි අපි පතමු.
කෑගල්ලේ සුනිල් කුමාර ගම්ලත්
