ශිරන්තිට සීඅයිඩියේ දී හදිසියේම සිංහල බැරි වෙයි..!

සිංහල බෞද්ධයන්ගේ ගැලවුම්කරුවන් සේ පෙනී සිටින පර්සි මහේන්ද්‍ර රාජපක්ෂගේ ප්‍රිය බිරිඳ ශිරන්ති වික්‍රමසිංහ රාජපක්ෂ “තමා සිංහල කියවීමට දන්නේ නැතැයි“  (16) රහස් පොලිසියේ දී කියා සිටියා ය. 
පැහැරගෙන ගොස් වධ දී ඝාතනය කර රිය අනතුරක් සේ ඇඟවූ රගර් ක්‍රීඩක වසීම් තජුඩීන්ගේ තිරශ්චීන ඝාතනය ගැන සිදුකරගෙන යන පරීක්ෂණ වලදී ඝාතකයන් භාවිතා කළ ඩිෆෙන්ඩර් රථයේ ඒ වන විට අයිතිකාරිය වූ ශිරන්ති වික්‍රමසිංහ රාජපක්ෂගෙන් ඒ පිළිබඳ කට උත්තරයක් ලබා ගැනීම සඳහා කොළඹ රහස් පොලිස් මූලස්ථානයට ඇයව ඊයේ කැඳවා තිබිණ.
පැය ගණනාවක ප්‍රකාශය සටහන් කර ගැනීමෙන් පසු එය කියවා ඊට අත්සන් කරන්නැයි රහස් පොලිස් නිලධාරීන් ශිරන්තිට කී විට ඇය තමාට සිංහල කියවීමට දන්නේ නැතැයි කියමින් නීතිඥයාගේ සහාය අවශ්‍ය යැයි දන්වා සිටියා ය. ආරම්භයේ දී ද ශිරන්තිගෙන් ප්‍රශ්න කරද්දී තමාට හෝ තම නීතිඥයාට ලඟ සිටිය හැකිදැයි මහින්ද රාජපක්ෂ රහස් පොලිසියෙන් ඉල්ලා සිටි නමුත් රහස් පොලිසිය එය ප්‍රතික්ෂේප කර තිබිණ.
(රහස් පොලිසියේ ප්‍රශ්න කිරීම් වලදී කිසිවෙකුට ලඟ සිටීමට ඉඩ දෙන්නේ නැත)
කෙසේ වෙතත් ශිරන්ති තමාට සිංහල කියවන්නට දන්නේ නැතැයි කී බැවින් රහස් පොලිස් නිලධාරීන් ඇයගේ නීතිඥයා වූ එළියේ සිටි ජයන්ත වීරසිංහ නමැති රාජපක්ෂලාගේ නීතිඥයා ඇතුලට කැඳවා එය කියවීමට ඉඩ දෙන ලද නමුත් නීතිඥයාට දන්වා සිටියේ ප්‍රකාශයේ සඳහන් කිසිවක් වෙනස් කිරීමට ඉඩ දිය නොහැකි බවයි. මන්ද යත් ශිරන්තිගෙන් ප්‍රශ්න කරන ලද්දේ සිංහලෙන් වන අතර ඇය පිළිතුරු දුන්නේ ද සිංහලෙනි. ඒ අනුව සටහන් තබන ලද්දේ ද සිංහලෙනි. ඇයගෙන් ප්‍රශ්න කිරීම සහ ඇයගේ ප්‍රකාශ සම්පූර්ණයෙන්ම  රහස් පොලිසිය විසින් පටිගත කර ඇති නිසාත් ඇය කියන ලද දේ මිස වෙනත් දෑ සටහන් තබා නොමැති නිසාත් නීතිඥයන්ට අවශ්‍ය ලෙස වෙනස් කිරීමට ඉඩ දිය නොහැකි යයි පැවසීය.  අවසානයේ නීතිඥ වීරසිංහ ශිරන්තිගේ කට උත්තරය කියවා විරෝධයක් නොදක්වා අත්සන් කරන්නැයි ශිරන්තිට දැනුම් දුන්නේය. 
ඉන්පසුව බදුල්ලේ ඉපදී බදුල්ලේ සිංහල මොන්ටිසෝරියකින් සිංහල ඉගෙන ගෙන පසුව කොළඹට පැමිණ හෝලි ෆැමිලි කොන්වන්ට් එකේ දී ද සිංහල සහ ඉංග්‍රීසි භාෂා දෙකෙන්ම ඉගෙන ගත් ශිරන්ති රාජපක්ෂට හදිසියේම රහස් පොලිසියේ දී වැළඳුනු සිංහල අමතක වීමේ රෝගය සුව වී තම කට උත්තරයට අත්සන් තැබුවා ය.
මේ අතර ශිරන්ති රාජපක්ෂ රහස් පොලිසියට කැඳවීම දේශපාලන ව්‍යාපෘතියක් බවට පත් කර ගත් ඒකාබද්ධ නඩය ඈත ගම් වල සිට බස් රථ වලින් සිය හෙංචයියන් සීඅයිඩිය ඉදිරිපිටට කැඳවා ‘වනචර යුගයේ වීදි නාටකය‘ රඟ දැක්වූහ. මිනිසුන්ට පහර දෙමින් වනචර යුගය යලි ජනතාවට මතක් කර දුන්හ.  වීඩියෝ ශිල්පීන්ගේ කැමරාවන්ට හසුවූ ‘වනචර යුගයේ වීදි නාටකය‘ පහත දැක්වේ. එහි ඇති අපූරුව නම් අසරණයෙකුට වට කර ගුටි දුන් රාජපක්ෂගේ මැරයන් බේරා ගුටි කෑ එකා පොලිසියට අරන් යෑමයි