Sri Lanka Rupee Converter
පන්සලක්‌, පල්ලියක්‌, කෝවිලක්‌ යනු මිනිසුන්ට සැනසීම ගෙනෙන තැන්ය. විපතකදී මිනිසකු පිහිට පතා දිවයන තැන්ය. 1994 අප්‍රේල් හයවැනිදා අසරණ ටුට්‌සි ගෝත්‍රික මිනිසුන් දහස්‌ ගණනක්‌ රුවන්ඩාවේ, නියාමාටා දේවස්‌ථානය වෙත දිවගියේ ජීවිතය බේරාගන්නට දෙවියන්වත් පිහිට වේ යෑයි සිතාගෙනය. එහෙත් සිදු වූයේ අනෙකකි. පූජනීය ස්‌ථානයක සිදුවිය හැකි බිහිසුණුම අමානුෂිකම අපරාධය එදා ඒ පල්ලිය තුළදී සිදුවිය. පල්ලියේ උන් හුටු ගෝත්‍රික අන්තවාදීන් පමණක්‌ නොව පල්ලියේ දේවගැතිවරුන්, කන්‍යා සොහොයුරියන් ද එක්‌ව ඒ අසරණ ජනතාව තුවක්‌කුවලින් වෙඩිතබා කැති මන්නාවලින් කපා කොට ඝාතනය කොට දැමූහ. එසේ මරා දැමුණු පිරිස පනස්‌ දහස ඉක්‌මවයි. අදටත් ඒ මැරුණු මිනිසුන්ගේ ඇඳුම්, හිස්‌කබල්, ඇටකටු හා සුන්බුන් නියාමාටා පල්ලිය තුළදී දැකබලා ගන්නට හැකිය.
රුවන්ඩා ජන සංහාරය ලෝක ඉතිහාසය තුළ මිනිස්‌ වර්ගයාට එරෙහිව කළ අමානුෂිකම අපරාධවලින් එකකි. ජනවාර්ගික ගැටලුව යනු රුවන්ඩාවට අලුත් අත්දැකීමක්‌ නොවේ. රුවන්ඩාවේ වැසියන්ගෙන් 85% ක්‌ පමණම හුටු ගෝත්‍රිකයන්ය. එහෙත් දිගු කාලයක්‌ තිස්‌සේ රටේ බලය හිමිව තිබුණේ සුළු ජාතිකයන් වූ ටුට්‌සි ගෝත්‍රිකයන්ටය. 1959 දී හුටු ගෝත්‍රිකයන් විසින් ටුට්‌සි පාලනය පරාජයට පත් කළ අතර හුටු ගෝත්‍රිකයන්ගේ ප්‍රචණ්‌ඩ ක්‍රියා නිසා දසදහස්‌ ගණන් ටුට්‌සි ගෝත්‍රිකයන්ට අසල්වැසි රටවලට පලා යන්නට සිදුවිය. මෙසේ රටින් පිටුවහල් කෙරුණු ටුට්‌සි ගෝත්‍රික කණ්‌ඩායමක්‌ එකතුව - රුවන්ඩා දේශප්‍රේමී පෙරමුණ - නමින් කැරලි කණ්‌ඩායමක්‌ බිහිකළේය. 1990 අවුරුද්දේ රුවන්ඩාවේ අයිතිය යළි ලබාගන්නට සටන් ඇරඹූ රුවන්ඩා දේශප්‍රේමී පෙරමුණ 1993 දී සාමගිවිසුම් අත්සන් තැබෙන තුරු අඛන්ඩව වසර තුනක්‌ සටන් කළහ.
එතැනදී එළඹුණු තාවකාලික සාමය 1994 දී අවසන් විය. ඒ 1994 අවුරුද්දේ අප්‍රේල් හය වැනිදා රාත්‍රියේය. එවකට රුවන්ඩාවේ ජනපති වූ හුටු ජාතික ජුවෙනල් හබියාරිමානා ගමන් කළ ගුවන් යානයට වෙඩිතබා බිම හෙළනු ලැබීය. ගුවන්යානයේ උන් සියලු දෙනාම මියගියහ. හුටු අන්තවාදීන් මේ සිදුවීමේ වරද පටවනු ලැබුවේ ටුට්‌සි ජාතික රුවන්ඩා දේශප්‍රේමී පෙරමුණටය. ගුවන්යානය විනාශ වූ සැනින්ම වාගේ ටුට්‌සි ජනයා සංහාරය ඇරඹිණ. හදිසියේ පටන් ගත්ත ද එය මැනවින් සංවිධානය කෙරුණු ජනසංහාරයක්‌ විය. එනිසා පසුව රුවන්ඩා දේශප්‍රේමී පෙරමුණ කීවේ ගුවන්යානයට වෙඩිතැබීමත් ටුට්‌සි ජනසංහාරය කිරීමට නිදහසට කාරණයක්‌ සොයාගන්නට හුටු අන්තවාදීන් විසින් සැලසුම් සහගතව කළ දෙයක්‌ බවය.
ඒ වන විටත් එක්‌සත් ජාතීන්ගේ හමුදාවන් හා බෙල්ජියම් හමුදාව රුවන්ඩාව තුළ කඳවුරු ලාගෙන සිටියහ. එහෙත් මේ මහා ජනසංහාරය නවත්වන්නට ඒ කිසිවකු කිසිවක්‌ කළේ නැත. සෝමාලියාවේදී ඇමෙරිකානු හමුදා මරා දැමීමෙන් පසුව කිසිදු අප්‍රිකානු අර්බුදයකට මැදිහත් නොවන්නට එක්‌සත් ජාතීන් විසින් තීරණය කොට තිබිණ. හුටු රජයේ මිත්‍ර රටක්‌ වූ ප්‍රංශය ආරක්‌ෂිත කලාපයක්‌ ඇති කරන්නට හමුදා බල ඇණියක්‌ එවූ නමුත් ඒ කලාපය තුළවත් ඝාතන නවත්වන්නට කිසිදු ක්‍රියාමාර්ගයක්‌ නොගත් බවට චෝදනා එල්ල විය.
දින සියයක්‌ පුරා මේ මහා ජනසංහාරය සිදුවිය. එය නවත්වන්නට කිසිවකු මැදිහත් වූයේ නැත. ඒ වන විට උගන්ඩා හමුදාවේ සහය ඇතිව මැනවින් සංවිධානය වූ රුවන්ඩා දේශප්‍රේමී පෙරමුණ ජූලි හතර වැනිදා කිගාලි නගරය ආක්‍රමණය කළහ. ජනසංහාරයේ යෙදී උන් මිලියන ගණනක්‌ වූ හුටු ජාතිකයන් පළිගැනීමේ ප්‍රහාරවලට බියෙන් කොන්ගෝ දේශ සීමාවට පලා ගියහ.
නිම්මි මුදිතා හේරත්
