මුහුදේ ගිලීමට ගිය රූපලාවන්‍ය ශිල්පිනියන් දෙදෙනා බේරා ගනී....!!!

තම ඥති හිත මිතුරන් සමඟ විනෝදයට මීගමු මුහුදේ දිය නෑමට ගිය තුරුණු රූපලාවන්‍ය ශිල්පිනියන් දෙදෙනකු දියවැළකට අසුවී ගසාගෙන ගොස්‌ මරුවා සමඟ පොර බදමින් සිටියදී ඔවුන් දෙදෙනාගේ ජීවිත බේරා දීමට මීගමුව සංචාරක පොලිසියට අනුයුක්‌ත ජීවිතාරක්‍ෂක සේවයේ නියුතු සැරයන් (17344) සරත් කුමාර මහතා සමත් විය.
මීගමුව ඒත්තුකාල වෙරළ උද්‍යානය අසල මුහුදේ ඔවුන් දිය නෑමට 20 දා ගොස්‌ ඇත. මෙම අනතුරෙන් දිවි ගලවාගෙන ඇත්තේ ජාඇල මාඑළිය ප්‍රදේශයේ පදිංචි මංජුලා රොද්‍රිගු (30) සහ ජාඇල උතුරු බටගම පදිංචි පියුමි බිඳුකලා නමැත්තියන්ය.
විමර්ශනයේදී අනාවරණ වූ තොරතුරු අනුව මෙම කතුන් දෙදෙනා තම දෙමාපියන් සහ ඥතීන් 20 ක්‌ සමඟ මුහුදේ නෑමට මීගමුවට පැමිණ ඇත. කතුන් දෙදෙනා ඇතුළු පිරිස මුහුදේ නාමින් සිටියදී ඔවුන් දෙදෙනා දියවැලකට හසුවී දියේ ගිලී මරුවා සමඟ පොරබදමින් සිට ඇත. එම අවස්‌ථාවේ එම කතුන්ගේ දෙමාපියන් ආදීන් අසරණව බලා සිටියදී වහා එම කතුන් වෙත පිහිනා ගිය සැරයන්වරයා ඔවුන්ගේ දිවි ගලවාදී ඇත. අධික ලෙස මුහුදු වතුර පෙවී අසාධ්‍යව සිටි එම කතුන් දෙදෙනාට වහා ප්‍රථමාධාරදී පසුව ඔවුන් පිටත්කොට යවා ඇත.