Sri Lanka Rupee Converter
.jpg)
තවත් යුද අපරාධකරුවකුට වසර 20 ක සිර දඬුවමක්‌ ලැබී ඇත. ජිනීවා මානව හිමිකම් කවුන්සිලය කනගසබේ දේවදාසන් යුද අපරාධකරුවකු ලෙස නම් කරන්නේ ද නැද්ද යන්න අපි නොදනිමු. නමුත් 2008 වසරේ පෙබරවාරි 03 වැනිදා කොළඹ කොටුව දුම්රිය ස්‌ථානයේදී එල්.ටී.ටී.ඊ. මරාගෙන මැරෙන බෝම්බකාරියක විසින් සිදුකළ ප්‍රහාරයට ආධාර අනුබලදීමේ චෝදනාවට වරදකරු වූ වැල්ලවත්ත ප්‍රදේශයේ පදිංචිකරුවකු යෑයි කියන නාදන් යෑයි අන්වර්ථ නාමයෙන් හඳුන්වන යුද අපරාධකරුවාට කොළඹ මහාධිකරණ විනිසුරු පියසේන රණසිංහ විසින් පෙරේදා (29 දා) බරපතළ වැඩ ඇතිව විසි වසරක සිර දඬුවමක්‌ නියම කරනු ලැබීය.
එදා 2008 පෙබරවාරි තුන්වැනිදා රටම ත්‍රස්‌ත භීෂණයට ලක්‌ව තිබිණි. ගාලු මුවදොරදී පැවැත්වෙන හැටවන නිදහස් සමරුව කඩාකප්පල් කිරීම සඳහා කොටි සංවිධානය මහත් වෑයමක්‌ දරන්නට විය. එනිසා පෙබරවාරි 03 වැනිදා පෙරවරු කාලයේ දෙහිවල සත්වෝද්‍යානයේ බෝම්බයක්‌ පුපුරා ගිය අතර, සවස 2 ට පමණ මේ නාදන්ගේ උදව්වෙන් කොටුව දුම්රිය ස්‌ථානයේදී මරාගෙන මැරෙන බෝම්බකාරිය ක්‍රියාත්මක වූවාය. මෙම බෝම්බයට කොළඹ ඩී. එස්‌. සේනානායක විද්‍යාලයේ බේස්‌බෝල් කණ්‌ඩායම බිලි විය. ත්‍රිකුණාමලයේ පාසල් සිසුන් පස්‌දෙනකු ඝාතනය ගැන කතා කරන මානව හිමිකම් සංවිධාන කොළඹ කොටුවේදී මරාගෙන මැරෙන බෝම්බයට බිලි වූ ඩී. එස්‌. සිසුන් ගැන කතා කරන්නට මැලි වෙති. මෙය කවර කුහකත්වයක්‌ ද? මානව හිමිකම් හැඳි දෙකකින් බෙදන්නේද?. ජිනීවා මානව හිමිකම් කොමිසමේදී 2008 පෙබරවාරියේ ඝාතනය වූ ඩී. එස්‌. සිසුන් ගැන කතා කරන්නේ කවරෙකුද? එහෙත් ත්‍රිකුණාමලයේ සිද්ධිය ගැන නම් අදටත් කතා කරයි.
කොළඹ බෝම්බ අතහැර දමා යුද අපරාධ ගැන සාකච්ඡා කළ හැකිද? කොළඹ බෝම්බ පිපිරුණේ හමුදා කඳවුරු තුළද? කොටුව දුම්රියපළ හමුදා නිවස්‌නයක්‌ ද? නැත.
කොටුව දුම්රිය ස්‌ථානයේ මරාගෙන මැරෙන බෝම්බයට ඩී. එස්‌. සේනානායක විද්‍යාලයේ බේස්‌ බෝල් පුහුණුකරු වූ මාලින්ද අරුමාදුර, හා රාජරත්නම් රදීෂ්වරන්, සුපුන් හලල්ල, එරංග චතුරංග, තිවංක තිසේරා, දිනුත් ප්‍රියශංක, කෝලිත වාසලමුදලිගෙ, විමුක්‌ති සජාන් යන සිසුන් පිරිස බිලිවිය. මේ ෙ€දවාචකය ගැන 2008 පෙබරවාරි 05 වැනිදා "දිවයින" පුවත්පතේ ලිපියක්‌ පළව තිබූ අතර, එහි සඳහන්ව තිබුණේ ක්‍රීඩා කණ්‌ඩායමක වැඩිම පිරිසක්‌ එකට අවසන් ගමන් ගිය පළමු අවස්ථාව මෙම සිද්ධිය බවයි. මරාගෙන මැරෙන ප්‍රහාරයට බිලි වූ මේ සිසුන්ගේ මානව හිමිකම් උල්ලංඝනය වූයේ නැද්ද? මොවුන් වින්දිතයන් නොවේද? සංහිඳියා කොමිසම කොටුවේ බෝම්බයෙන් මියගිය ඩී. එස්‌. සිසුන් ගැන කිසිම සඳහනක්‌ කර ඇත්ද? යුද අපරාධකරුවකු වන නාදන්ට දඬුවම් දීම හරහා හෝ මේ මියගිය සිසුන්ට යම් සාධාරණයක්‌ ඉටුවීද?
2008 රට තුළ පැවති තත්ත්වය අද බොහෝ දෙනකුට අමතක වීම කනගාටුදායකය. ලොව බිහිසුණුම ත්‍රස්‌තවාදී සංවිධානයක්‌ සමඟ මෙරට හමුදාව සටන් කළ බව අප කිසි විටෙක අමතක කළ යුතු නැත. එනිසාම යුද අපරාධ දංගෙඩියට අපේ රණවිරුවන් ගෙන යැමට සිදුකරන උත්සාහයන් පරාජය කළ යුතුය. 2008 දී රට තුළ පැවැති මරණයේ භීතිය වසර නමයක්‌ ගතවෙද්දීම අමතක වුවහොත් මේ ජාතියට අත්වන්නේ කවර ඉරණමක්‌ ද? අතීතය අමතක කළ හොත් වර්තමානය අඳුරු වී අනාගතය ෙ€දවාචකයක්‌ වනු ඇත.
නිරායුධ මිනිසුන් අමු අමුවේ ඝාතනය කළ යුගය 2009 මැයි මාසයෙන් පසුව අවසන් විය. එසේ නමුත් සිය ගණන් අසරණ වැසියන් අමු අමුවේ මරා දැමූ ත්‍රස්‌ත යුද අපරාධකරුවන්ට නම් නිසි දඬුවම් ලැබිය යුතුය.
