මරා දමා තිබූ වැස්ස හා පැටවා සිහිකර සාංඝික දානයක් පිරිනැමූ අපූරු මිනිසෙක්...!!!

ආදරයෙන් කරුණාවෙන් දිවා රෑ නොබලා රැකබලා ගත් එළ ගව වැස්සිය හා පැටියා යම්කිසි පිරිසක් විසින් සොරාගෙන ගොස් මස් කිරීම සම්බන්ධයෙන් කනගාටුවට පත් ගව හිමියෙක් සිය නිවෙසේ ධර්ම දේශනයක් පවත්වා  (29දා) අලුයම සඟසතු දානයක් පිරිනමා සත්දින පින්කමක් සිදුකළ පුවතක් පිළිබඳ කෑගල්ල නගරයට ආසන්න ගමකින් වාර්තා වෙයි.
කෑගල්ල නගරයට කිලෝමීටරයක් පමණ දුරින් පිහිටි දෙවෙල්දෙණිය ග්‍රාමයේ පදිංචි එල්.ඒ. චන්ද්‍රසේන (අවු. 70) මහතාට 2009 වර්ෂයේදී අසල ග්‍රාමයේ පදිංචිව සිටින ඩේවිඩ් නමැති මහතකු විසින් එළ වැස්සියක් රැකබලා ගැනීමට ලබාදී ඇත.
එම එළ වැස්සියට පසුව මඩුවක් තනා අසල කුඹුරේ බඳිමින් දිවා රෑ නොබලා රැක බලාගෙන තිබේ. මෙම වැස්සිය කීප අවස්ථාවකදීම පැටවුන් 4 - 5 බිහිකර තිබුණු අතර එම පැටවුන්ද මස් පිණිස අලෙවි නොකරන පුද්ගලයන් හට රැකබලා ගැනීමට ලබාදී තිබිණි. අවසානයට මීට මාස 7කට පමණ ඉහතදී එළ වැස්සිය යළි ගැහැනු සතකු බිහිකර තිබුණු අතර එම ගැහැනු සතාට චන්ද්‍රසේන මහතා 'රතු' යැයි නමක්ද තබා තිබේ. වැස්සියට එරෙන සියලුම කිරි රතු පැටියා වෙනුවෙන් වෙන්කර තිබිණි. චන්ද්‍රසේන මහතා වැස්සියගෙන් කිරි දෙවීම පවා සිදුකොට නොමැත.

එම නිසාම පැටවා හොඳින් වැඩෙමින් සිටි බවද චන්ද්‍රසේන මහතා පැවැසීය.
ඉකුත් ජනවාරි 22දා මේ එළ ගව දෙන සහ පැටවා සුපුරුදු පරිදි ගව මඩුවේ බැඳ සිටියදී රාත්‍රි 11.30ත් අලුයම 1.10ත් අතර කාලය තුළ වෑන් රථයකින් පැමිණි පිරිසක් එළ වැස්සිය සහ පැටවා පටවාගෙන ගොස් ඇතැයි දැන ගන්නට ලැබී ඇත. පසුව චන්ද්‍රසේන මහතා ගව මඩුවේ සහ කුඹුරේ සුදු කොඩි ඔසවා තිබූ අතර පින්කමදා නිවෙසේ බෞද්ධ කොඩි ඔසවා තිබිණි. මස් පිණිස රැගෙන ගිය එළ වැස්සිය හා පැටවා සිහිකර ඉකුත් 28දා රාත්‍රියේ චන්ද්‍රසේන මහතාගේ නිවෙසට ස්වාමීන් වහන්සේ නමක් වැඩමවා ශබ්දවාහිනී යන්ත්‍ර ඔස්සේ ධර්ම දේශනයක් පවත්වා ඊයේ (29දා) අලුයම වැලිමන්නාතොට, අශෝකාරාම විහාරස්ථානයේ වැඩ වාසය කරන ස්වාමීන් වහන්සේ දස නමකට අටපිරිකර දෙකක් සහිතව පිරිකර පූජා කර පැන් වඩා අතුරුදන් වූ එළ වැස්සිය හා පැටවාට පින් අනුමෝදන් කිරීමේ සත්දින පින්කමක්ද පැවැත්විණි. එය ප්‍රදේශයේ කාගේත් නෙත් සිත් පහන් කරවීය. මේ පිළිබඳ අදහස් දක්වමින් එල්.ඒ. චන්ද්‍රසේන මහතා මෙසේ පැවැසීය.

වල්දෙණියේ ඩේවිඩ් මහතා මට මීට වසර 8කට පමණ ඉහතදී එළ වැස්සියක් ලබා දුන්නා. මම උෟට ගෙයක් හදලා දීලා කුඹුරේ බඳිමින් දිවා රෑ රැකබලා ගත්තා. පස්සේ පැටව් කිහිප දෙනෙක් ලැබුණා. එම පැටව් මස් පිණිස අලෙවි නොකරන කීපදෙනකුට රැකබලා ගැනීමට දුන්නා. අදත් ඒ සත්තු ජීවතුන් අතර ඉන්නවා. අවසානයට මීට මාස 7ට පමණ ඉහතදී වැස්සිය ගැහැනු සතකු බිහිකළා. ඊට පස්සේ මම වැස්සිගෙන් කිරි ‍ෙදාවා ගත්තේ නැහැ. පැටියාටම බොන්න දුන්නා. හැමදාම රෑට තුන් හතර පාරක් ගව මඩුව දිහා බලනවා. එදා 22දා රෑ මම 11.30ටත් ගව මඩුව දිහා බැලුවා. පසුදින අලුයම 1.10ට යළි බැලුවා. එතකොට සතුන් දෙදෙනා හිටියේ නෑ. දවල් වෙලා අපේ නිවෙසට යාබද තිබෙන සී.සී.ටී.වී. කැමරාව පරීක්‍ෂා කර බැලුවා. ඩොල්ෆින් වර්ගයේ වෑන් රථයක් ඇවිල්ලා හරවාගෙන සත්තු දෙන්නා පටවාගෙන යන අයුරු තිබුණා. මට මේ ගැන හරිම කනගාටුයි. මේ වගේ දෙයක් මේ ප්‍රදේශයේ සිදුවෙලා නෑ. මට මේ දුක උහුලගන්න අමාරුයි. ඒ නිසා මම පසුගිය 28දා ගමේ ඔක්කොටම කියලා රාත්‍රි ධර්මදේශනයක් පවත්වලා  (29දා) උදේ විහාරස්ථානයට ගිහින් අටපිරිකර දෙකක් සමඟ පිරිකර පූජා කරලා පැන් වඩා පින් අනුමෝදන් කළා. මම ගවමස් කන්නේ නැහැ. ගවමස් කන සියලු දෙනාගෙන් මම ඉල්ලා සිටිනවා මේක නතර කරන්න කියලා. ඒ වගේම කෑගල්ල නගරයේ ගවමස් වෙළෙඳසල් දෙකක් තියෙනවා. ඒ මුදලාලිලාටත් මම කියනවා ඔය වෙළෙඳාම නතර කර වෙන වෙළෙ¼දාමක් කරන්න කියලා. වෙන වෙළෙඳාමක් කරනවා නම් මමත් ඔවුන්ට උදවු උපකාර කරනවා.
 දමුණුපොළ - චමින්ද ජයලත්