Sri Lanka Rupee Converter
යහපාලන ආණ්ඩුවේ සභා නායක මෙන්ම මහාමාර්ග ඇමැති ලක්ෂ්මන් කිරිඇල්ල සහ ප්‍රාථමික කර්මාන්ත ඇමැති දයා ගමගේ එක්වී කැබිනට් මණ්ඩලය නොමග යවමින් සහ පිළිගත් දේශපාලන සදාචාරය බල්ලාට දමමින් රුපියල් කෝටි 363 ක් හෙවත් රුපියල් බිලියන 3.6 ක මහා මාර්ග තැනීමේ කොන්ත්‍රාත්තුවක් සඳහා කැබිනට් අනුමැතිය ලබා ගෙන තිබේ.
පසුගිය ජුනි 03 වෙනි දින රැස්වූ කැබිනට් මණ්ඩලයට මහා මාර්ග ඇමැතිවරයා ලෙස ලක්ෂ්මන් කිරිඇල්ල විසින් කැබිනට් පත්‍රිකාවක් ඉදිරිපත් කරමින් කොන්ත්‍රාත් 18 ක් සඳහා කැබිනට් අනුමැතිය ලබා ගෙන ඇති අතර එහි 17 සහ 18 දරණ කොන්ත්‍රාත් 2 ලබා දී ඇත්තේ Olympus construction (pvt) Ltd නමැති පුද්ගලික සමාගමකට ය. එකී සමාගම ඉන්දීය සමාගමක් වන රානී කන්ස්ට්‍රක්ෂන් පුද්ගලික සමාගම සමග හවුල් සමාගමක් බව එහි දක්වා තිබේ. අදාල සාක්කි ද මෙහි දැක්වේ
මෙම කොන්ත්‍රාත්තු දෙකම කළුතර දිස්ත්‍රික්කයේ ග්‍රාමීය මාර්ග පුනරුත්ථාපනය සහ වැඩි දියුණු කිරීම සඳහා යැයි දැක්වෙන අතර එකක් කිලෝ මීටර් 89 කි. අනෙක කිලෝ මීටර් 94 කි. කිලෝ මීටර් 89 සඳහා මුදල රු. 1,811,352,867 යි ශත 60 ක් වන අතර කිලෝ මීටර් 94 සඳහා මුදල රු. 1,817,750,688 යි ශත 60 කි. මුළු මුදල රු. 3,629,103,556 යි ශත 20 කි. (අදාල කැබිනට් පත්‍රිකාවේ පිටපතක් මෙහි දැක්වේ)
මෙම වාසනාවන්ත Olympus construction (pvt) Ltd නමැති සමාගම බැලූ බැල්මට පෙනෙන්නේ ඉන්දීය සමාගමක් ලෙස වුවද එහි සත්‍ය හිමිකරුවා අන් කිසිවෙක් නොව දයා ගමගේ ය. ( අදාල සාක්කි ද මෙහි දැක්වේ)
මෙය නීත්‍යාණුකූල ලෙස ටෙන්ඩර් පටිපාටියකින් ලබා ගත්තා යැයි උපකල්පනය කෙළේ වුවද අදාල ටෙන්ඩරය අනුමැතිය සඳහා කැබිනට් මණ්ඩලයට ඉදිරිපත් කිරීමට පෙර ටෙන්ඩරය ලබා දෙන Olympus construction (pvt) Ltd හි අයිතිකරුවා එකී කැබිනට් මණ්ඩලය තුල සිටින්නේ යැයි ලක්ෂ්මන් කිරිඇල්ල ඇමැතිවරයා විසින් කැබිනට් මණ්ඩලය දැනුවත් කළ යුතුය. ජුනි 03 වෙනිදා ඔහු එලෙස දැනුවත් කර නැත. ඒ අනුව එය පැහැදිලිවම කැබිනට් මණ්ඩලය නොමග යැවීමකි.
සදාචාරය බල්ලාට දමා ඇතැයි චෝදනා නගන්නේ මෙවැනි සිදුවීමක් වෙද්දී එනම් තමාට සම්බන්ධ ටෙන්ඩරයක් කැබිනට් මණ්ඩලයට ඉදිරිපත් වෙද්දී දයා ගමගේ කළ යුතුව තිබුනේ ඊට තමන්ගේම අත උස්සා අනුමැතිය දීම නොව එම කැබිනට් මණ්ඩලයට සහභාගී නොවී සිටීමය. නමුත් ජුනි 03 වෙනිදා ඒ කිසිවක් නොමැතිව දයා ගමගේ තමන්ගේම අත උස්සා තමන්ටම බෙදා ගෙන තිබේ. මෙය ලැජ්ජා නැති දූෂිත ක්‍රියාවකි.
දයා ගමගේ දේශපාලනයට ඒමට පෙරම පාරවල් හැදීමේ කොන්ත්‍රාත් කරුවෙක් බැවින් ද, ලෝක බැංකුවේ ආධාර ලබා ලංකාවේ පාරවල් හැදූ ප්‍රථම පුද්ගලික ව්‍යාපාරිකයාද වන බැවින් මෙම කොන්ත්‍රාත්තුව ඔහුට ලබා දීමට සුදුසුකම් තිබුනා වුවද, ජනවාරි 8 වෙනිදා ජනතාව රාජපක්ෂලා එළවා යහපාලන ආණ්ඩුවක් පත් කර ගත්තේ මෙම ගජ මිතුරු බිස්නස් දේශපාලනය අවසන් කිරීමට ය. නමුත් එය කැබිනට් මණ්ඩලය නොමග යවමින් මෙන්ම සියළු සදාචාරයන් බල්ලාට දමමින් සිදුවීම සුළු කොට තැකිය නොහැකිය. අනෙක් අතට දයා ගමගේ ප්‍රාථමික කර්මාන්ත ඇමැතිවරයා ලෙස එම ක්ෂේත්‍රයට මෙතෙක් කිසිදු වැදගැම්මකට ඇති දෙයක් ඉටු කර නැත.
(පහත දැක්වෙන ඉමේජයන් මත ක්ලික් කිරීමෙන් අදාල සාක්කි විශාල කර බැලිය හැකිය)
