Sri Lanka Rupee Converter
-ජනපති මෛත්‍රිපාල සිරිසේන පත්තරෙන් තම රටේ තොරතුරු දැනගන්නා ලොව ප්‍රථම ජනාධිපති
අපේ රටේ පුවත්පත්වල මුල් පිටුව රට නැති කරන පිටුව බවට පත්ව ඇතැයි ජනාධිපති මෛත්‍රිපාල සිරිසේන (22 වැනිදා) ප්‍රකාශ කළේය.
ජනාධිපතිවරයා මේ බැව් පැවසුවේ බත්තරමුල්ල වෝටර්ස්‌ එඡ් හෝටලයේදී ඊයේ සවස පැවැති තාක්‍ෂණ හා විද්‍යාත්මක ප්‍රකාශන සඳහා ජනාධිපති සම්මාන ප්‍රදානෝත්සවයට සහභාගි වෙමිනි.
එහිදී වැඩිදුරටත් අදහස් දැක්වූ ජනාධිපතිවරයා රටේ පුවත්පත්වල මුල් පිටුවල දරුවන්ට රාජ්‍ය නිලධාරීන් හෝ පොදු මහජනතාවට අවශ්‍ය දෙයක්‌ පළවන්නේ නැති බවත් ශ්රී ලංකාවේ මාධ්‍ය කලාව ලෝකයේ කිසිදු රටක නැති දේශපාලන චින්තනයක්‌ බවට පත්වී ඇතැයිද කීවේය.
පුවත්පත රටක අනාගතය ගොඩ නැගීමේ තීරණාත්මක සාධකය වුවත් වර්තමානයේ පුවත්පත්වල මුල්පිටුව සරසන්නේ ස්‌ත්‍රී දූෂණ, මිනීමැරුම්, මංකොල්ලකෑම් හා දේශපාලන ගැටුම් වැනි කසල ගොඩවල්වලින් බවද ජනාධිපතිවරයා ප්‍රකාශ කළේය.
රටක් ගොඩනැගීමේ කාර්යයේදී මාධ්‍යයට ඇති වගකීම සුළු පටු කාරණයක්‌ නොවන බවත් එහෙත් අප රටේ මාධ්‍යයට ආණ්‌ඩු පෙරලන්න ආණ්‌ඩු අප්‍රසාදයට පත් කරන්නට දේශපාලනඥයින් හදන්න දේශපාලඥයින් බලයෙන් ඉවත් කරන්නට අවශ්‍ය වී ඇතැයිද ජනාධිපතිවරයා කීවේය.
