Sri Lanka Rupee Converter
වෙඩි නොවදින මෝටර් රථයක්‌ පාවිච්චි කරමින් රුපියල් කෝටි නවයකට අධික මුදලක්‌ අවභාවිත කිරීමේ චෝදනාව මත පොලිස්‌ මූල්‍ය අපරාධ කොට්‌ඨාසය මගින් අත්අඩංගුවට ගත් හිටපු ඇමැති විනයාගමූර්ති මුරලිදරන් නොහොත් කරුණා අම්මාන් ලබන 7 වැනිදා දක්‌වා රක්‍ෂිත බන්ධනාගාරගත කරන ලෙස කොළඹ ප්‍රධාන මහෙස්‌ත්‍රාත් ගිහාන් පිලපිටිය ඊයේ (29 වැනිදා) නියෝග කළේය.
පුනරුත්ථාපන, නැවත පදිංචි කිරීම් සහ නැගෙනහිර සංවර්ධන ඇමැතිවරයා ලෙස කටයුතු කරද්දී කරුණා අම්මාන් මෙම වෙඩි නොවදින මෝටර් රථය පාවිච්චි කර ඇති බව පරීක්‍ෂණවලින් හෙළිවී තිබේ.
මේ සම්බන්ධයෙන් ප්‍රකාශයක්‌ ලබාදීමට පැමිණෙන ලෙස හිටපු ඇමැතිවරයාට පොලිස්‌ මූල්‍ය අපරාධ කොට්‌ඨාසය මගින් දැනුම්දී තිබිණි.
ඒ අනුව හෙතෙම ඊයේ පෙරවරුවේ පොලිස්‌ මූල්‍ය අපරාධ කොට්‌ඨාසය හමුවේ පෙනී සිටි අතර පැය හතරකට ආසන්න කාලයක්‌ ඔහුගෙන් ප්‍රකාශ ලබා ගැනීමෙන් අනතුරුව අත්අඩංගුවට ගෙන ඇත. පොලිස්‌ මූල්‍ය අපරාධ කොට්‌ඨාසයේ විශේෂ ආරක්‍ෂාවක්‌ යටතේ කරුණා අම්මාන් අධිකරණය වෙත රැගෙන යන ලදි.
පසුව හිටපු ඇමැතිවරයා කොළඹ ප්‍රධාන මහෙස්‌ත්‍රාත්වරයා වෙත ඉදිරිපත් කරනු ලැබුවේ සවස 2.00 ට පමණය.
ලබන 7 වැනිදා දක්‌වා රක්‍ෂිත බන්ධනාගාර ගත කළ කරුණා අම්මාන් විශේෂ ආරක්‍ෂාවක්‌ යටතේ වැලිකඩ බන්ධනාගාරය වෙත ඊයේ සවස රැගෙන යන ලදි.
