25,000 ක දඩ මුදලට එරෙහිව ක්‍රියාත්මක කරන මෙම වැඩවර්ජනය

හෙට බස්‌ වර්ජනය ස්‌ථිරයි
- අන්තර් පළාත් පෞද්ගලික බස්‌ සංගමයේ සභාපති
ගැමුණුගේ තීරණය අද


හෙට (01 දා) දීපව්‍යාප්ත පෞද්ගලික බස්‌ වර්ජනය අනිවාර්යයෙන්ම ක්‍රියාත්මක කරන බව අන්තර් පළාත් පෞද්ගලික බස්‌ සංගමයේ සභාපති සරත් විජිත කුමාර  පැවසීය.
වාහන වැරදි සම්බන්ධයෙන් පැනවූ රුපියල් 25,000 ක දඩ මුදලට එරෙහිව ක්‍රියාත්මක කරන මෙම වැඩවර්ජනයට ගැමුණුගේ බස්‌ සංගමය හැර අනෙක්‌ බස්‌ සංගම් ද ත්‍රිරෝද රථ හා පාසල් වෑන් රථ සංගම් ද සහාය දක්‌වන බව හෙතෙම සඳහන් කළේය.
අනෙකුත් පෞද්ගලික බස්‌ සමාගම් ද මේ සඳහා සහාය දක්‌වන බව පැවසූ වර්ජනයෙන් ගැමුණු ගේ නොහැකියාව රටටම ප්‍රදර්ශනය වනු ඇතැයි ද මේ වන විට ඔහු වර්ජනය පිළිබඳව විවිධ කටකතා ප්‍රචාරය කොට කඩාකප්පල්කාරී වැඩපිළිවෙළක්‌ ආරම්භ කර ඇතැයි ද වැඩිදුරටත් පැවසීය.

මේ අතර සංගම් කිහිපයක්‌ විසින් හෙට ක්‍රියාත්මක කිරීමට යන පෞද්ගලික බස්‌ වර්ජනය සඳහා සහාය ලබා දෙනවාද නැද්ද යන්න පිළිබඳව අද (30 දා) සවස තීරණය කරන බව ලංකා පෞද්ගලික බස්‌ හිමියන්ගේ සංගමයේ සභාපති ගැමුණු  කීය.
වාහන වැරදි සඳහා වන දඩය මෙවර අයවැයෙන් ශත පහකින්වත් වැඩි කළේ නැතැයි රජය ප්‍රකාශ කළ යුතු බවත් දඩ මුදල් ඉහළ දැමීමට රජයට කිසිදු නෛතික පදනමක්‌ නැති බවත් හෙතෙම සඳහන් කළේය.
රජය අද එම ප්‍රකාශය කළ යුතු බවත් එසේ නොමැති වුවහොත් වර්ජනය පිළිබඳව සිය සංගමය තීරණයක්‌ ගන්නා නමුත් වර්ජනයට යනවාමයි මතයේ තමුන් තවමත් නැති බවත් ඒ මහතා වැඩිදුරටත් කියා සිටියේය.