රියැලිටි තරුවලට කාර් දෙනවා නම් වික්ටර් රත්නායකට නැවක් දෙන්න ඕනෑ...!!!

ලක්‍ෂ්මන් විජේසේකර දකින ඇත්ත ...!!!
”ඇයි අලූතින් ගීතයක් එහෙම නිර්මාණය නොකෙලේ?”
  මම හැම ප‍්‍රවීණයකුගෙන්ම අසන ප‍්‍රශ්නය ලක්ෂ්මන්ටද යොමු කරමි.
”ගීත කලාට ප‍්‍රචාරය කරගන්න බැහැනේ.. ඉතිං මොකටද සිංදු කරන්නේ. අද කවුරුත් වගේ ඒ අයගේ පරණ සිංදුවලින් යැපෙනවා විතරයි. හැබැයි ඒ හැමෝම දැන් සිංහල සිංදු කියන්න ගන්න ගාන වැඩි කරලා. ඒකට හේතුව තමයි රියැලිටි තරු ගාස්තුව ලක්ෂයක් විතර අය කිරීම. එහෙම අය කරලා ඒ අය කියන්නේ අනුන්ගෙ සිංදු. මේ නිසා ඒ සිංදුවල සැබෑ හිමිකාරයන්ටත් තමන්ගේ ගණන් වැඩි කරන්න සිදු වුණා. මේකෙන් ගෘහස්ථ ප‍්‍රසංග සංවිධානය කරන අය අසීරුවට පත්වෙලා.”
ලක්ෂ්මන් වර්තමාන සංගීත ක්ෂේත‍්‍රයේ ස්වභාවය ගැන කතා කරන්නට පටන් ගත්තේය.
”අද රියැලිටි තරුවලට කාර් දෙනවා. හරි නම් තරු අතරෙත් තරුවක් වුණු වික්ටර් රත්නායකට නැවක් දෙන්න ඕනේ. මේ ඔක්කොම වෙනස්කම් කරන්නේ මාධ්‍ය ආයතනවලින්. ඒත් රූකාන්තගෙන් පස්සේ අපේ සංගීත ක්ෂේත‍්‍රයට දැනෙන වෙනසක් කරන්න ඔය කාටවත්ම බැරි වුණා.

අද ඔය වෙනස්කම් කරනව කියන අය කරන්නෙ එහෙන් මෙහෙන් කෑලි ටිකක් එකතු කරලා තනිකරම බොරුවක් කරන එක. මේ අය සිංදු ජනප‍්‍රිය කරන්නේ මියුසික් වීඩියෝ එකෙන්. වීඩියෝ එක බලනකන් සිංදුව ජනප‍්‍රියයි. හැබැයි මාස හයකට විතර පස්සේ සිංදුව ඉවරයි. මේ සිංදු ජනප‍්‍රියයි කියන්න පුළුවන්ද? සිංදු ජනප‍්‍රිය නම් කාලාන්තරයක් තිස්සේ තියෙන්න ඕනෙ. වික්ටර් රත්නායකලගෙ, මිල්ටන් මල්ලවාරච්චිලගෙ, ජෝතිපාලලගෙ සිංදු ඔය තවමත් තියෙන්නේ... ඒකනේ ජනප‍්‍රියකම කියන්නේ.’’
 ලක්ෂ්මන් විජේසේකර

 ශාන්ත කුමාර විතාන / සේයාරූ ඇලෙක්සැන්ඩර් බාලසූරිය