පැන ගිය කොටි ත‍්‍රස්තයෙක් මැරුවා කියා හමුදා මේජර්ට සිර දඬුවම්.. විසි ලක්‍ෂයක් වන්දි ගෙවන්නත් වෙයි..

එල්ටීටීඊ සාමාජිකයෙකු අත්අඩංගුවෙන් පැනයාමට උත්සාහ කලේ යයි නොසැලකිලිමත්ව වෙඩි තබා මරා දැමුවේ යයි චෝදනාවකට වරදකරු වූ විශ‍්‍රාමික හමුදා මේජර්වරයෙකුට කොලඹ මහාධිකරණය විසින් වසර දෙකක අත්හිටවූ සිර දඩුවමක් හා මිය ගිය කොටි ත‍්‍රස්තවාදියාගේ ළගම ඥාතීන්ට රුපියල් විසි ලක්‍සයක් වන්දි ගෙවීමටද නියම කර ඇත.

1998 වසරේදී මෙම සිදුවීම සිදුව ඇත්තේ පේදුරුතුඩුව යුද හමුදා කදවුරේදීය.
මෙම සිදුවීම මත විශ‍්‍රාමික හමුදා මේජර් කමල් වික‍්‍රමසූරියට නොසැලකිලිමත් ලෙස වෙඩි තබා මිනීමැරීමක් නොවන සාවද්‍ය මනුෂ්‍ය ඝාතනයක් සිදු කළ බවට චෝදනා එල්ල වී තිබින.
 කඳවුරේ රඳවා සිටියදී අත්මාංචු පිටින්ම පලායාමට උත්සාහ කළ එල්. ටී. ටී. ඊ. ක්‍රියාකාරකම් සම්බන්ධ යෙන් සැකපිට අත්අඩංගුවට ගත් පුද්ගලයෙකුට අපරික්‍ෂා කාරී ලෙස හා නොසැලකිලිමත් ලෙස වෙඩි තැබීමෙන් මරණයට පත් කිරීමේ චෝදනාවට වරදකරු කරනු ලැබු විශ්‍රාමික හමුදා නිලධාරියකුට කොළඹ මහාධිකරණ විනිසුරු සරෝජනි කුසලා වීරවර්ධන  (31 දා) වසර 10 කට අත්හිටවූ දෙවසරක සිරදඬුවමක්‌ නියම කළාය.

මරණයට පත්වූ පුද්ගලයාගේ පවුලේ සමීප ඥතීන්ට රුපියල් ලක්‍ෂ 20 ක වන්දියක්‌ ගෙවන ලෙසත් නියම කළ මහාධිකරණ විනිසුරුවරිය දඩයක්‌ ලෙස තම අධිකරණය විසින් නියම කළ එම වන්දිය නොගෙවන්නේ නම් මාස 12 ක අනිවාර්ය සිරදඬුවමක්‌ ද නියම කළාය.

1998 වසරේදී පේදුරුතුඩුව යුද හමුදා කඳවුරේ රඳවා සිටි රොබට්‌ වෙලින්ඩන් නමැති සැකකරු මරණය සිදුකිරීමෙන් දණ්‌ඩ නීති සංග්‍රහයේ 298 වගන්තිය යටතේ දඬුවම් ලැබිය හැකි වරදක්‌ සිදු කළැයි විමල් වික්‍රමගේ නමැති යුද හමුදා නිලධාරියාට එරෙහිව නීතිපතිවරයා විසින් එම නඩුව පවරා තිබිණි.

එවකට ලුතිනන්වරයෙකු වූ විත්තිකරු එම හමුදා කඳවුර භාර අණදෙන නිලධාරියා ලෙස කටයුතු කළ බව සාක්‍ෂි විභාගයේදී අනාවරණය වූ අතර ඔහු මේ වනවිට හමුදා සේවයෙන් විශ්‍රාම ගොස්‌ ඇති අයකු බවද පැවැසේ.

එම දඬුවම්වලට අමතරව විත්තිකරුට රුපියල් 10,000 ක දඩයක්‌ ගෙවීමටද නියම කළ විනිසුරුවරිය එම දඩය නොගෙවන්නේ නම් මාස 6 ක අමතර සිරදඬුවමක්‌ ලබාදීමට ද නියම කළාය.

රජයේ ජ්‍යෙෂ්ඨ අධිනීතීඥ ලක්‌මිණි ගිරිහාගම  නීතිපතිවරයා වෙනුවෙන් පැමිණිල්ල මෙහෙයවූ අතර නීතිඥ සාලිය පීරිස්‌, නීතිඥ රුක්‌ෂාන් නානායක්‌කාර යන මහත්වරුන් විත්තිකරු වෙනුවෙන් පෙනී සිටියහ.