Sri Lanka Rupee Converter
ගැටලුවට ලක්‌වූ මෙම ගොඩනැඟිල්ල පසුගිය රජය සමයේ බැසිල් රාජපක්‌ෂ ගේ මැදිහත්වීමෙන් ඉදිකළ ද ඒ සම්බන්ධයෙන් කිසිදු තොරතුරක්‌ එම සමරු ඵලකයේ තිබී නැත.
වසරක පමණ සිට මේ සතිපොළ ගොඩනැඟිල්ල වෙළෙඳුන් විසින් භාවිත කරමින් සිටි අතර එහි නිල වශයෙන් විවෘත කිරීම සඳහා මෛත්‍රිපාල සිරිසේන ජනාධිපතිවරයාගේ නායකත්වයෙන් අගමැති රනිල් වික්‍රමසිංහගේ මෙහෙයවීමෙන් නැගෙනහිර මහ ඇමැති නසීර් අහමඩ්ගේ ප්‍රධානත්වයෙන් නැගෙනහිර පළාත් සභාවේ සභාපති චන්ද්‍රදාස ගලප්පත්තිගේ ආරාධනයෙන් පළාත් සභා මන්ත්‍රීවරුන් වන මෙත්තානන්ද සිල්වා, මංජුල ප්‍රනාන්දු ඇතුළු නිලධාරීන් කිහිපදෙනකුගේ නම් සඳහන් කරමින් සමරු ඵලකයක්‌ද සංවිධායකවරුන් විසින් එම ගොඩනැඟිල්ලේ සවිකර තිබිණි. එහෙත් එයට අමාත්‍ය දයා ගමගේගේ හා ඔහුගේ බිරිඳගේ නම ඇතුළත් වී නොතිබිණි.
දමන ප්‍රාදේශීය සභාවේ නිලධාරීන් මෙම ගොඩනැඟිල්ල පෙරේදා උදෑසන 10.00 ට විවෘත කිරීම සඳහා සියලු කටයුතු සූදානම් කර මහ ඇමැතිවරයා එනතෙක්‌ බලා සිටියදී අමාත්‍යවරයා සහ ඔහුගේ බිරිඳ ද පළාත් සභා මන්ත්‍රී මංජුල ප්‍රනාන්දුද පැමිණ මහා සංඝරත්නයේ ආශිර්වාද මැද ගොඩනැඟිල්ල විවෘත කර ඇත.
ඔවුන් පිටව ගිය පසු මහ ඇමැතිවරයා පළාත් සභාවේ සභාපතිවරයා හා පළාත් සභා මන්ත්‍රී මෙත්තානන්ද සිල්වා ඇතුළු පිරිසද ගොඩනැඟිල්ල විවෘත කිරීමට පැමිණ තිබේ. ඒ අවස්‌ථාවේ සංවිධායකවරුන් විසින් නැවත බෙරගසා ආරාධිතයන් ගෙන ගොස්‌ සමරු ඵලකය නිරාවරණය කර ඇත. අමාත්‍යවරයා සහ බිරිඳ පැමිණි අවස්‌ථාවේ සමරු ඵලකය ආවරණය කර තිබූ රෙදි කැබැල්ල ඔවුන්ගේ ආධාරකරුවන් විසින් රැගෙන ගොස්‌ තිබූ නිසා මහ ඇමැතිවරයා ඇතුළු පිරිස සමරු ඵලකය නිරාවරණය කිරීමට පැමිණි අවස්‌ථාවේ එය බ්‍රවුන් පේපර් කොළ කැබැල්ලකින් ආවරණය කර තිබිණි.
මෙහිදී නැගෙනහිර පළාත් සභාවේ සභාපති චන්ද්‍රදාස ගල්පත්ති කතා කරමින් සමහර අය බලහත්කාරයෙන් ඇවිත් ත්‍රස්‌තවාදීන් ලෙස කටයුතු කිරීම කනගාටුදායකයි. මගේ වසර 40 ක දේශපාලනයේ මේ වගේ අශීලාචාර වැඩක්‌ වුණේ අදයි. තමන්ට අයිති නැති තැන්වලට ඇවිත් සමහර අය වළං කඩේට පැනපු හරක වගේ කටයුතු කළා යෑයි කියා සිටියේය.
