Sri Lanka Rupee Converter
නාගරික මන්ත්‍රීවරයාගේ හිඳ පාර්ලිමේන්තු මන්ත්‍රීවරයා ඇමැතිවරයා දක්‌වා වූ පිරිස එදවස දුන් පොරොන්දු ගෙන ආ යෝජනා ක්‍රියාත්මක විණිනම් අද මේ ටික හෝ ලියෑවෙන්නේ නැත. ගංවතුර ආපදාවට දැන් මාස හතරකි. මාස හතරකින් නොව සතියකින් නිම කළ හැකි වැඩ හෝ තවමත් නිමකර නැත. ඒ නිසාම ගංවතුරට යටවූ ජනතාවට තවමත් ග්‍රාම සේවක නිලධාරීන් මුණගැසීමටත්, ප්‍රාදේශීය ලේකම් කාර්යාල, දිස්‌ත්‍රික්‌ ලේකම් කාර්යාලවල රස්‌තියාදු වීමටත් කාලය සොයා ගැනීමට සිදුව තිබේ. ඒ ඉල්ලීම් ඉදිරිපත් කිරීමටත්, ඇත්තටම තමන්ට ලැබිය යුතු දේ ගැන කියන්නවත් නොව "කන්නලව්" කිරීමටය. කන්නලව් කරන්නේ දෙවියන්ටය. ඇත්තටම වගකිවයුතු ආයතනවල පුටු රත් කරන, ටයිපටිවලින් බෙල්ල හිරකරගත් බත් කන හරක් සිතා සිටින්නේ තමන් දෙවිවරු බවය. මෙතැන ප්‍රශ්නය වී තිබෙන්නේ දෙන ටික දෙන්නට හෝ හැකියාවක්‌ නැති කමය, උනන්දුවක්‌ නැති කමය.
ශ්‍රී ලංකාව, දිවයිනටම යටත් වන පරිදි ඩොලර් බිලියන දහයකට රක්‍ෂණය කර ඇති බවත්, ඒ නිසාම හානිවූ නිවාසවලට ලක්‍ෂයේ සිට ලක්‍ෂ 25 ක්‌ දක්‌වා වූ වන්දි ගෙවන බව කීවේ ඇමරිකානු ජනාධිපතිවරණයට තරග වදින "ඩොනල්ඩ් ට්‍රම්ප්" හෝ "හිලරි ක්‌ලින්ටන්" නොවේ. මේ රටේම වගකිවයුතු දේශපාලනඥයන්ය. ගංවතුර බැස ගොස්‌ සතියක්‌ ගතවන විට මාධ්‍ය සාකච්ඡාවලදී කීවේ මිලියන ගණනක ආධාර ලබාදී ඇති බවය. ගංවතුරට යටවූ ජනතාව මේ දිනවල සොයමින් හිඳින්නේ එම මිලියන ගණන ලබාගත් උදවියය. මේ රට ඩොලර් බිලියන දහයක රක්‍ෂණයකට යටත් කර ඇතිබව කී රක්‍ෂණාභාර අරමුදල මූලික ගෙවීමක්‌ ලෙස ගෙවන ලද රුපියල් දසදහසක මුදල ඇතැම් නිවාසවලට පමණක්‌ ලැබී ඇත. ඉතිරි අයට ඒ මුදල නොලැබුණේ ඇයි? ඒ හැරත් රුපියල් දසදහසකින් කැඩුණු නිවසක්‌ හදනවා තබා හදන්නට පටන් ගැනීම පවා කළ නොහැකි කාරණයක්‌ බව මේ ගැන කටයුතු කරනවා යෑයි කියන ආයතනවල ඔලමොට්‌ටලයන්ට නොතේරේද? ඒ ගැන අසන විට කියන්නේ "මුලින් රුපියල් දසදහසක්‌ දෙනවා. ඊට පස්‌සේ ඇස්‌තමේන්තු කරලා ඉතිරි මුදල දෙනවා" යනුවෙනි. මාස හතරක්‌ ගතවන තුරුත් ඇස්‌තමේන්තු හැදුවාද, නැතිනම් පොල් ගෑවාදැයි අප අසන්නේ නැත. ඒ ඇත්තටම සිදුවන්නේ එවැනි වැඩ නිසා එය කාගේ කාගේත් ලඡ්ජාවට හේතුවිය හැකි නිසාය.
මේ රටේ "ආපදා කළමනාකරණ මධ්‍යස්‌ථානය" යනුවෙන් ආයතනයක්‌ තිබේ. එහෙම එකක්‌ තිබෙන බව රටට දැනෙන්නේ ගංවතුරක්‌, නාය යැමක්‌ ආ විටය. ඊටපසු ඒ ගැන අහන්න දකින්නවත් ලැබෙන්නේ නැත. ඇස්‌තමේන්තු ගත කිරීම්වලදී, වාර්තා සැකසීමේදී, මේ ආයතනයෙන් අනෙකුත් වගකිවයුතු ආයතනවලට දෙන සහයෝගය කුමක්‌ද? එවැනි සම්බන්ධීකරණයක්‌ ඒ ඒ ආයතනවල නැද්ද? එසේනම් ඊට හේතුව කුමක්‌ද? අදාළ බලධාරීන් මේවා රටට හෙළි කළ යුතුය.
වාර්තා ලබාගෙන, ඇස්‌තමේන්තු සකස්‌ කර ආධාර ලබාදීම දක්‌වා වූ ක්‍රියාවලිය තුළ ආපදා කළමනාකරණ මධ්‍යස්‌ථානය, දිස්‌ත්‍රික්‌ ලේකම් කාර්යාල, ප්‍රාදේශීය ලේකම් කාර්යාල මගින් සිදුවිය යුත්තකි. එම වාර්තා ලැබුණු පසු ඉක්‌මනින්ම වන්දි ගෙවිය හැකි බව ජාතික රක්‍ෂණාභාර අරමුදල කියයි. ඒ අනුව කාරණය ඉතාම පැහැදිලිය. අදාළ ආයතනවල නිලධාරීන්ට මේ කාරණය එතරම් බරපතළ නැත. ඒ නිසාම වැඩේ "ඇදගෙන" යති. එම ආයතන අයත් අමාත්‍යාංශවල ඇමැතිවරුන්ට මේ ආකාර්යක්‍ෂමතාව පෙනෙන්නේ නැත. ඒ අයට, කාර්, දීමනා, නිවාස ඇතුළු තමන්ගේ ගොඩ වැඩි කර ගැනීමේ මෙහෙයුම් තිබේ. ඒ නිසාම ඊළඟ ගංවතුරද එනතුරු ඔහොම යං...
දිවයින කතුවකියෙනි
