Sri Lanka Rupee Converter
"රටේ ආර්ථිකය කඩාවැටිලා රට ටි්‍රලියන් ගණන් ණයවෙලා තියෙද්දී ජනතාවට සේවය කරන්න ආව මැති ඇමැතිවරු රුපියල් කෝටි 118 ක්‌ වැය කරලා අති සුඛෝපභෝගී වාහන ගන්න එක බරපතළ වරදක්‌" යෑයි නියෝජ්‍ය ඇමැති රන්ජන් රාමනායක පැවැසීය.
රටේ ජනතාවට පටි තදකර ගන්න කියලා ජනතාවට සේවය කරන්න ආව මැති ඇමැතිවරුන් සුඛෝපභෝගී ජීවිත ගත කිරීමට රටේ ධනය වැය කිරීම කෙසේවත් අනුමත කළ නොහැකි බවද රන්ජන් රාමනායක වැඩිදුරටත් කියා සිටියේය.
මැති ඇමැතිවරුන් තිස්‌දෙනකු අති සුඛෝපභෝගී වාහන මිලදී ගැනීම සඳහා රුපියල් කෝටි 118 ක මුදලක්‌ පරිපූරක ඇස්‌තමේන්තුවක්‌ මගින් පාර්ලිමේන්තුවට ඉදිරිපත් කිරීම සම්බන්ධයෙන් කළ විමසීමකදී රාමනායක මේ බව කියා සිටියේය.
මෙහිදී වැඩිදුරටත් අදහස් දැක්‌වූ රන්ජන් රාමනායක මෙසේ ද කීය.
සැප වාහන ගෙන්වන එක තාවකාලිකව නතර කරන්න අග්‍රාමාත්‍යවරයා ගන්න තීරණය ඉතාම හොඳයි. සැප වාහන ගන්න ආව යෝජනාවට මම කැමැති වුණේ නැහැ.
අපි බලයට එන කොට ජනතාවට කිව්වෙ හැම කෙනකුටම වාහනයක්‌ ගන්න තත්ත්වයට ආර්ථිකය ගොඩනගනවා කියලා. ඒත් රටේ ඇතිවෙලා තියන ණය බර සහ අනෙකුත් විපත් නිසා අද ජනතාවට පටි තද කර ගන්න වෙලා. ඒවගේ වෙලාවක අනවශ්‍ය දේකට මෙතරම් විශාල මුදලක්‌ වෙන් කරන එක වැරදියි.
මම පාවිච්චි කරන්නෙ 2011 වර්ෂයේ ලියාපදිංචි කළ වාහනයක්‌. ඒක මාසෙකට සැරයක්‌ කැඩෙනවා. ඒත් මම ඒක කොහොම හරි හදාගෙන පාවිච්චි කරනවා.
මම නිල නිවසක්‌වත් අරගෙන නැහැ. තාමත් ඉන්නෙ මාදිවෙල මන්ත්‍රි නිවසෙ. රටේ ප්‍රශ්න ඇතිවෙලා තියන වෙලාවෙ අනිත් අයත් අනවශ්‍ය වියදම් අඩු කරගන්න ඕනෙ. එහෙම නොකර පසුගිය ආණ්‌ඩුව කරපු අනවශ්‍ය වියදම් අපිත් කරන්න ගියොත් යහපාලන ආණ්‌ඩුවත් මිනිස්‌සු ප්‍රතික්‍ෂේප කරයි.
