Sri Lanka Rupee Converter
අවතැන් වූවන් ආරක්‍ෂිත ස්‌ථාන පන්සිය අනූහතක්‌ වෙත යොමු කර ඇතැයි ද හෙතෙම සඳහන් කළේය.
මෙම අනතුරුවලින් නිවාස තුන්සිය පනස්‌ හතරක්‌ පූර්ණ වශයෙන් ද තවත් නිවාස තුන්දහස්‌ තුන්සිය විසිහයක්‌ අර්ධ වශයෙන් ද හානි වී ඇති බව ප්‍රදීප් කොඩිප්පිලි පැවසීය.
බස්‌නාහිර තත්ත්වය
(20 වැනිදා) සවස්‌ වන විට බස්‌නාහිර පළාතේ පීඩාවට පත්ව සිටි ජනතාව තුන්ලක්‍ෂ විසිඑක්‌දහස්‌ තුන්සිය පනහ දක්‌වා ඉහළ ගොස්‌ තිබිණි. ඉන් එක්‌ලක්‍ෂ අසූපන්දහස්‌ අටසිය තිස්‌දෙනකුම කොළඹ දිස්‌ත්‍රික්‌කයෙන් වාර්තා විය.
(20 වැනිදා) සවස්‌ වන විටත් මාදම්පිටිය පාර, ෆර්ගියුසන් පාර, ග්‍රෑන්ඩ්පාස්‌, අඹතලේ පාර, අඹතලේ - හංවැල්ල මාර්ගය, කඩුවෙල, කැලණිමුල්ල, බියගම යන ප්‍රදේශ ජලයෙන් යටව තිබූ බව වාරිමාර්ග දෙපාර්තමේන්තුවේ වාරිමාර්ග අධ්‍යක්‍ෂ ජානකී මීගස්‌තැන්න පැවසුවාය.
අරණායක හා බුලත්කොහුපිටිය ප්‍රදේශයේ නායයැම්වලින් අතුරුදන් වූ පුද්ගලයන් සොයා කරන මෙහෙයුම් තවදුරටත් සිදු කරන බව ආපදා කළමනාකරණ මධ්‍යස්‌ථානයේ අධ්‍යක්‍ෂ ජනරාල් මේජර් ජනරාල් එල්. එම්. ආර්. මාර්ක්‌ (20 වැනිදා) සඳහන් කළේය.
මෙම නායයැම් සිදු වූ ස්‌ථානයන්හි තවදුරටත් නායයැම් සිදුවිය හැකි බැවින් එම ස්‌ථාන නැරඹීමට පැමිණීමෙන් වළකින ලෙස හෙතෙම ජනතාවගෙන් ඉල්ලීමක්‌ ද කළේය. මේ ප්‍රදේශයන්ට ජනතාව පැමිණීම සහන සේවා සැපයීමට බාධාවක්‌ බවත් හෙතෙම කියා සිටියේය.
(19 වැනිදා) අරණායක සාමසර කන්දේ තවත් කොටසක්‌ නාය ගිය බවත් මාර්ක්‌ පැවසීය.
ඉදිරි පැය විසිහතර තුළ තවදුරටත් වැසි ඇතිවුවහොත් දිස්‌ත්‍රික්‌ක හතක නායයැම් හා පස්‌ කණ්‌ඩි කඩාවැටීම් ඇතිවිය හැකි බව ජාතික ගොඩනැඟිලි පර්යේෂණ සංවිධානයේ නායයැම් අධ්‍යයන අංශ ප්‍රධාන ආර්. එම්. එස්‌. බණ්‌ඩාර (20 වැනිදා) සඳහන් කළේය.
මහනුවර, රත්නපුර, කුරුණෑගල, නුවරඑළිය, කෑගල්ල, මාතලේ සහ කළුතර එම දිස්‌ත්‍රික්‌ක හත වන බව හෙතෙම වැඩිදුරටත් සඳහන් කළේය.
ගංවතුරට කොටු වී ජීවිතයත් මරණයත් අතර සටනක යෙදී සිටි පුද්ගලයන් 18,673 ක පමණ ප්‍රමාණයක්‌ ඉකුත් දින කිහිපය තුළදී නාවික හමුදාව මගින් බේරාගෙන ඇත.
නාවික හමුදාව මගින් ජීවිත ආරක්‍ෂක බෝට්‌ටු 83 ක්‌ යොදා ඇති අතර ඒ සඳහා නාවික භටයන් දිවා රෑ නොතකා සේවයේ යෙදෙන බව නාවික හමුදාව කියයි.
හංවැල්ල, රණාල, දොම්පේ, බියගම, පූගොඩ, නවගමුව, මල්වාන, කඩුවෙල, බෝමිරිය, අංගොඩ, කැලණිය, කැලණිමුල්ල, මුල්ලේරියාව, කොටිකාවත්ත, කොලොන්නාව, වැල්ලම්පිටිය යන පළාත් රැසක ගංවතුරට කොටු වූවන් ඉවතට ගැනීම සඳහා නාවික හමුදාව මෙම මෙහෙයුමේ යෙදී සිටින බව නාවික හමුදා ප්‍රකාශකයෙක්‌ කීය.
මේ අතර නාවික හමුදාවට අමතරව පොලිසිය සහ ගුවන් හමුදාව ද වතුරට කොටු වූ පවුල් බේරා ගැනීමේ මෙහෙයුමට එක්‌වී සිටිති.
ගංවතුරට කොටු වී සිටින පුද්ගලයන් බේරාගැනීම සඳහා ගුවන් හමුදාව බෙල් 212 සහ බෙල් 412 හෙලිකොප්ටර් දෙකක්‌ මාරුවෙන් මාරුවට යොදවා ඇති අතර තවත් හෙලිකොප්ටරයක්‌ සූදානම් කර තිබෙන බව ගුවන් හමුදාව කියයි.
මේ අතර ගංවතුරට කොටු වූ පවුල් බේරා ගැනීමේ මෙහෙයුමට යුද හමුදාව සහ පොලිසියත් එක්‌වී සිටිති.
