Sri Lanka Rupee Converter
ත්‍රස්‌තවාදය පරාජය කර මුළු රටම එක සිංහ කොඩියක්‌ යටතට ගෙනා රාජපක්‍ෂ ආණ්‌ඩුවේ පසුකාලීන පරිහානියට හේතු වූ කාරණා කිහිපයක්‌ තිබේ. ඉන් පළමුවැන්න නිදහසින් පසු මෙරට පහළ වූ වඩාත් ම දූෂිත ආණ්‌ඩුව ලෙස එය චෝදනා ලැබීමය. දෙවැන්න ඥාති සංග්‍රහය ය. තෙවැන්න දේශපාලන කටහැකරයන්ගෙන් සහ දේශපාලන දාමරිකයන්ගෙන් එම ආණ්‌ඩුව පිරෙන්නට පටන් ගැනීම ය. මෙය පරාභවයට අවශ්‍ය සියලු කරුණු සම්පූර්ණ වීමකි. ඕනෑම දෙයක්‌ කල් යන විට කුණු වෙයි. එහෙත් මේ ආණ්‌ඩුව කටහැකරයන් නිසා කල් නො යාම කුණ වෙන්නට පටන් ගෙන තිබේ. එයට ආසන්නතම උදාහරණය වරාය සභාපති ධම්මික රණතුංග නමැති පුද්ගලයා පසුගියදා කොළඹ අලුත්කඩේ උසාවියේදී පුවත්පත් වාර්තාකරුවන්ට බැණ වැදී ඔවුන්ගේ ඡායාරූප ගැනීම ය. ලක්‍ෂ්මන් කිරිඇල්ල විසින් පසුගියදා පුවත්පත් කලාවේදියකුට දුරකථනය මගින් කුණුහරුපෙන් බැණීම පිළිබඳ සිද්ධිය මෙහිදී සාකච්ඡා කරනු නො ලැබේ. මන්ද ඕනෑම ගොනකුට යුද්ධ කළ හැකි බව මෙයට කලකට පෙර කියන ලද්දේත් මේ කියන ලක්‍ෂ්මන් කිරිඇල්ලම ය. ඔහු එස්‌.බී. දිසානායක, පී. හැරිසන්, මර්වින් සිල්වා යනාදීන්ගේ මට්‌ටමේ යල්පැන ගිය වාචාලයෙකි. එහෙත් ධම්මික රණතුංග යනු මේ වාචාල කියෑවිල්ලට අලුත් කෙනෙකි. කවුද මේ ධම්මික රණතුංග?
ඔහු යහපාලන ඇමැති ධුරන්ධර සුචරිතවත් අර්ජුන රණතුංග ශ්‍රීමතාණන්ගේ සහෝදරයා ය. වරාය පවතින්නේ අර්ජුනගේ අමාත්‍යාංශය යටතේ ය. රාජපක්‍ෂලාගේ සහෝදර සමාගමට බැණ වදිමින් සිටි අර්ජුන රණතුංග වරාය ඇමැති බවට පත් වූ ගමන්ම කළේ සිය අයියා වන ධම්මික රණතුංග වරායේ සභාපති කිරීමය. ක්‍රිකට්‌ බෝලවලට බැට්‌වලින් තට්‌ටු කරමින් සිටි ධම්මික රණතුංග වරායක්‌ පාලනය කිරීම ගැන කුමක්‌ දනිත් ද යන්න මෙහිදී ප්‍රශ්න කරනු නො ලැබේ. හේතුව ගිය ආණ්‌ඩුවේ මෙන් ම මේ ආණ්‌ඩුවේ ද සිටින රාජ්‍ය ආයතන ලොක්‌කන් වැඩි හරියක්‌ම තමන් යටතේ පවතින ආයතනයේ විෂය කුමක්‌ ද යන්න දැන නො සිටීම ය. අයියාට සැලකුවාට කමක්‌ නැතá එහෙත් අයියාට පිස්‌සු කෙළීමට ඉඩක් මල්ලී නො දිය යුතු ය.
සමහර මිනිස්‌සු කල් යන විට හැදෙති. තව සමහරු කල්යන විට කට හැකරකම නිසාම වැනසෙති. දැනට විදුලිබල අමාත්‍යාංශයේ නියෝජ්‍ය ඇමැති ලෙස කටයුතු කරන අජිත් පී. පෙරේරා, කල් යන විට කට හදාගත් කෙනෙකි. මෙයට කලකට පෙර රූපවාහිනී සංවාදවලට එන ඔහු ඉතා සුළු ප්‍රශ්නවලින් ඇවිස්‌සී කෝපයට පත්ව භූමිතෙල් වැදුණු අර මොකාද මෙන් නටන්නට පටන් ගැනීමේ ස්‌වභාවයක්‌ තිබිණි. එහෙත් අද වන විට ඔහු ඒ මට්‌ටමේ නැත. විදුලිය කැපීම සම්බන්ධයෙන් පැවැති අවසන් පුවත්පත් සාකච්ඡාවේදී ඔහු ඉතා ඉවසිලිවන්තවත්, ප්‍රසාද ජනක ලෙසත් උත්තර දුන්නේය. එහෙත් මර්වින් සිල්වා, ලක්‍ෂ්මන් කිරිඇල්ල වැනි අය අදත් කට ඇරියොත් අසූචි බාල්දියක්‌ හැලුවා හා සමානය. කට යනු කෑමට සහ කතා කිරීමට ඇති අවයවයකි. කන දේ බඩට යයි. කියන දේ පිටට යයි. ඒ නිසා කන පරිදි කතා කරන්නට ගිය විට වැඩ වරදී. ධම්මික රණතුංග නමැති පුද්ගලයා මේ බව තේරුම් නොගතහොත් සිදුවන්නේ කූඤ්ඤය ගැලවූ වඳුරාගේ ශරීරයේ වැදගත් කොටස්‌ ලී කොටයට සිරවීමෙන් සිදුවූ ඇබැද්දිය හා සමාන දෙයක්‌ ය.
